चीनको जिङ्सुमा जारी बेल्ट एन्ड रोड सिरिजमा नेपाली यू–१९ महिला क्रिकेट टोलीले थाइल्यान्डलाई ५२ रनको फराकिलो अन्तरले हराउँदै तेस्रो जित दर्ता गरेको छ।
शुक्रबार भएको खेलमा पहिले ब्याटिङ गरेको नेपालले निर्धारित २० ओभरमा पाँच विकेट गुमाएर १०० रन बनाएको थियो। कप्तान सोनी पाख्रिनले ३२ र सना प्रभिनले ३० रनको योगदान दिए।
१०१ रनको लक्ष्य पछ्याएको थाइल्यान्ड १९ दशमलव २ ओभरमा ४८ रनमै समेटियो। थाइल्यान्डलाई रोक्न कप्तान सोनीले दुई ओभरमा चार रन खर्चेर तीन विकेट लिइन् भने मनिषा उपाध्याय र रिया शर्माले दुई–दुई विकेट लिए। अलराउन्ड प्रदर्शन गरेकी सोनी खेलको उत्कृष्ट खेलाडी घोषित भइन्।
नेपालले यसअघि पहिलो खेलमा थाइल्यान्डलाई नै पराजित गरेको थियो। चीनविरुद्धको दोस्रो खेल वर्षाका कारण रद्द भएको थियो भने तेस्रो खेलमा हङकङमाथि जित हात परेको थियो।
चार टोली सहभागी सिरिजमा हरेक टोलीले एकअर्कासँग दुई–दुई खेल खेल्नेछ। नेपालले आफ्नो पाँचौँ खेल शनिबार चीनसँग खेल्नेछ।
