परराष्ट्रमन्त्री शिशिर खनालको नेतृत्वमा नेपाली प्रतिनिधिमण्डल संयुक्त राष्ट्रसङ्घीय जलवायु सम्मेलन कोप–३१ मा सहभागी हुन शनिबार टर्कीए प्रस्थान गर्दैछ। टर्कीएको आन्ताल्या शहरमा आगामी नोभेम्बर ९ देखि २० सम्म चल्ने सम्मेलनमा नेपालले हिमाली मुलुकहरूको साझा चासो उठाउने तयारी गरेको छ।
परराष्ट्र मन्त्रालयका अनुसार मन्त्री खनालले नोभेम्बर ९ मा सम्मेलनको उद्घाटन सत्रलाई सम्बोधन गर्नेछन्। त्यसपछि नोभेम्बर ११ र १२ मा हुने विश्व नेताहरूको शिखर सम्मेलनमा पनि उनी सहभागी हुनेछन्।
सम्मेलनका क्रममा नेपाल, ताजिकिस्तान, किर्गिजस्तान, भुटान र पाकिस्तानको संयुक्त आयोजनामा हिमाली एजेन्डासम्बन्धी उच्चस्तरीय कार्यक्रम आयोजना हुँदैछ। हिमनदी, क्रायोस्फियर र जलवायु लचकतासम्बन्धी उक्त कार्यक्रममा मन्त्री खनाल सहभागी हुनेछन्।
यसबाहेक मन्त्री खनालले विभिन्न देशका समकक्षी मन्त्रीहरूसँग द्विपक्षीय भेटवार्ता गर्ने कार्यक्रम छ। प्रतिनिधिमण्डलमा कृषि, वन तथा वातावरणमन्त्री गीता चौधरी, राष्ट्रिय योजना आयोगका सदस्य प्रा. डा. सञ्जय आचार्य र मन्त्रालयका सचिव डा. राजेन्द्रप्रसाद मिश्रसहित नौ जना अधिकारी रहेका छन्। मन्त्री खनाल नोभेम्बर १४ मा स्वदेश फर्कनेछन्।
