काठमाडौं — नेपाल प्रिमियर लिगअन्तर्गत सुदूरपश्चिम रोयल्सविरुद्ध ३९ रनको हारपछि कर्णाली याक्सका तीव्र गतिका बलर नन्दन यादवले बलिङ विभाग नै कमजोर रहँदा टोलीले जित गुमाएको बताएका छन् । खेल सकिएपछि आयोजित पत्रकार सम्मेलनमा उनले विपक्षीले राखेको लक्ष्य भेट्न सकिने भए पनि बलरहरूले अनावश्यक रूपमा धेरै रन दिएको बताए ।
‘यो विकेटमा १४० रनको लक्ष्य ठूलो थिएन । यस्तो लक्ष्य भेट्न पनि सकिन्थ्यो र रोक्न पनि सकिन्थ्यो । तर हामीले बढी रन खर्चियौँ । मेरो बलिङ पनि राम्रो हुन सकेन । समग्रमा हाम्रो बलिङ कमजोर रह्यो,’ उनले भने ।
जवाफी ब्याटिङमा सुरुमै दुई विकेट गुम्दा टोलीमाथि दबाब परेको उनको भनाइ छ । ठूलो साझेदारीको योजना बनाए पनि मैदानमा त्यसलाई कार्यान्वयन गर्न नसक्दा खेलमा फर्किने बाटो बन्द भएको उनले बताए । रनरेट उकालो लाग्दै गएपछि जोखिम लिनुपरेको र नेपाली ब्याटरले लय समात्न नसक्दा अपेक्षित स्कोर बन्न नसकेको उनको भनाइ छ ।
पहिलो र दोस्रो इनिङ्समा पिचको अवस्था उस्तै रहेको बताउँदै उनले सुदूरपश्चिमले राम्रो क्रिकेट खेलेको स्वीकार गरे । डेथ ओभरमा इशान पाण्डेको बलिङबारे भने उनले हाँसो शैलीमा प्रतिक्रिया दिँदै त्यस्तो अवस्थामा कति दबाब हुन्छ भन्ने इशानलाई अहिले थाहा भएको बताए ।
दक्षिण अफ्रिकी स्टार डेभिड मिलर टोलीमा आबद्ध हुँदा आफूहरू निकै उत्साहित भएको उनले बताए । सानैदेखि हेर्दै आएका खेलाडीसँग एउटै टोलीबाट खेल्न पाउँदा खुसी लागेको उनको भनाइ छ । ‘मिलर टी–२० क्रिकेटका ठूला खेलाडी हुन् । उहाँले आजको खेलमा राम्रो ब्याटिङ गर्नुभयो । यस्तो कठिन विकेटमा पनि कसरी खेल्न सकिन्छ भन्ने उहाँले देखाउनुभयो । उहाँसँग खेल्दा नेपाली खेलाडीले धेरै कुरा सिक्न सक्छन्,’ उनले भने ।
दुई खेलमा दुई फरक नतिजा आएको उल्लेख गर्दै यादवले निराश हुनुपर्ने कारण नरहेको बताए । आगामी खेलमा राम्रो प्रदर्शन गर्दै लिगको शीर्ष स्थानमा पुग्ने लक्ष्य रहेको उनले बताए ।
