काठमाडौं । नेपाली कांग्रेसका महामन्त्री प्रदीप पौडेलले आफ्नो पार्टीमाथि पैसा तिरेर वैधानिकता लिएको भन्ने आरोप मनगढन्ते भएको बताएका छन् । चितवनको रत्ननगरमा शुक्रबार आयोजित कार्यक्रममा उनले यस्तो प्रचार राजनीतिक पूर्वाग्रहबाट प्रेरित भएको टिप्पणी गरे ।
पौडेलले कांग्रेसमाथि नियोजित रूपमा प्रहार गर्ने र पार्टीको वैधानिकतामाथि प्रश्न उठाउने प्रयास भइरहेको आरोप लगाए । कांग्रेसले साँच्चै पैसा तिरेर वैधानिकता लिएको भए सत्ताविरुद्ध सबैभन्दा सशक्त आवाज उठाउने पार्टीका रूपमा उभिन नसक्ने उनको जिकिर थियो । सभापति गगन थापाको नेतृत्वमा कांग्रेसले सत्ताको ज्यादतीविरुद्ध निरन्तर प्रश्न उठाउँदै आएको उनले बताए ।
आगामी स्थानीय चुनावमा कांग्रेससँग सत्ता पक्ष डराएको संकेत गर्दै उनले पार्टीको वैधानिकताबारे भ्रम फैलाउने काम भइरहेको दाबी गरे । कांग्रेसले कुनै गलत काम गरेको भए सत्ताले त्यसलाई राजनीतिक रूपमा उठाउने अवसर नछाड्ने उनको तर्क थियो ।
प्रहरी हिरासतमा रहेका इनम सापकोटाको बयान भनिएको अडियोबारे पनि पौडेलले प्रश्न उठाए । अडियो सत्य भएको भए सरकारले प्रहरीलाई तत्काल अनुसन्धान अघि बढाएर बयान लिई अदालतमा पेस गर्न निर्देशन दिनुपर्ने उनको भनाइ थियो । तर, बयानबारे प्रहरीलाई वक्तव्य नदिन लगाउने र विषयलाई अन्योलमा राख्ने काम भइरहेको उनले आरोप लगाए । प्रमाण हुन्थ्यो भने सरकारले यतिका दिन पर्खेर नबस्ने उनको जिकिर थियो ।
