काठमाडौँ — जनमत पार्टीका अध्यक्ष डा. सीके राउतले आगामी प्रदेश निर्वाचन सम्पन्न नहुँदासम्म आफ्नो दल मधेश प्रदेश सरकारमा सहभागी नहुने घोषणा गरेका छन्। शुक्रबार सामाजिक सञ्जालमार्फत आफ्नो धारणा सार्वजनिक गर्दै उनले पार्टीको निर्णयविपरीत सरकारमा जाने कुनै पनि प्रदेश सांसदलाई राजीनामा दिन वा दल छाड्न चुनौती दिए।
मुख्यमन्त्री वा मन्त्रीको पद प्रस्ताव भए पनि दल सरकारमा नजाने राउतको भनाइ छ। प्रदेश निर्वाचन आउन अब छदेखि सात महिना मात्र बाँकी रहेको उल्लेख गर्दै उनले सत्ता र मन्त्रालयको भागबन्डामा अल्झिनुभन्दा जनताको बीचमा पुगेर अधिकारका लागि संघर्ष गर्नु नै उपयुक्त हुने बताए। अहिले सरकार बनाउने भन्दा संगठन सुदृढ गर्ने समय भएको उनको तर्क छ।
पद र सत्ताप्रतिको मोह त्यागेर जनअधिकारको लडाइँमा केन्द्रित हुनुपर्नेमा उनले जोड दिए। दुईचारवटा मन्त्रालय लिन सरकारमा जानु जनताको चाहना र अग्रगामी मोर्चाको भावनाविपरीत हुने उनको भनाइ छ।
मधेश केन्द्रित दलहरूलाई विभाजन र विलय गराएर कमजोर बनाउने प्रयास भइरहेको आरोप लगाउँदै राउतले ती शक्तिहरूको राजनीतिक खेलमा फेरि नफस्न आग्रह गरे। लुम्बिनी प्रदेशमा मधेश केन्द्रित दलहरू छिन्नभिन्न पारिएको प्रसंग उठाउँदै उनले मधेशी दल र नेतालाई बदनाम गरी उनीहरूको राजनीतिक शक्ति घटाउने षड्यन्त्रप्रति सचेत रहन आग्रह गरे।
अग्रगामी मोर्चाले यस विषयमा कडा निर्णय गरिसकेको स्मरण गराउँदै उनले मोर्चा आफ्नो निर्णयमा अडिग रहेको विश्वास व्यक्त गरे। पछिल्लो समय सरकारमा सहभागिताबारे बाहिर आएका चर्चा केवल मिडिया ट्रायल मात्र होऊन् भन्ने आफ्नो अपेक्षा रहेको पनि उनले बताए।
