इरानले अमेरिकासँग कागजी प्रतिबद्धताका आधारमा मात्रै कूटनीतिक वार्ता पुनः सुरु नगर्ने स्पष्ट पारेको छ ।
इरानको सर्वोच्च राष्ट्रिय सुरक्षा परिषद्का उपसचिव अली बाघेरी कानीले अमेरिकाले आफ्ना प्रतिबद्धता व्यवहारमा पूरा गरेको देखिएपछि मात्रै नयाँ अध्याय सुरु गर्ने आधार तयार हुने बताएका छन् । सरकारी प्रसारण संस्था आईआरआईबीसँग कुरा गर्दै उनले भने, ‘इरानले अमेरिकाका व्यावहारिक कदम आफ्नै आँखाले देख्नुपर्छ । जब त्यस्ता कदम देखिन्छन्, तब मात्रै नयाँ अध्याय खोल्ने वातावरण बन्न सक्छ ।’
बाघेरी कानीले पछिल्लो डेढ वर्षमा भएका वार्ताका चारवटै चरण अमेरिकाले आफ्ना प्रतिबद्धता उल्लंघन गरेर विफल बनाएको आरोप लगाए ।
उनका अनुसार इरानको सर्वोच्च राष्ट्रिय सुरक्षा परिषद्का प्रमुख मोहसेन रेजाईले बिहीबार रुसी राष्ट्रपति भ्लादिमिर पुटिनसँग तीन घण्टा लामो भेट गरेका थिए । उक्त भेटको मुख्य उद्देश्य सर्वोच्च नेता आयतोल्लाह मोज्तबा खामेनीको सन्देश पुर्याउनु थियो । सन्देशमा द्विपक्षीय सहकार्यका लागि इरानका प्राथमिकताहरू समेटिएको र खामेनीको नेतृत्वमा इरान–रुस सम्बन्धको अवस्थाबारे मस्कोलाई स्पष्ट जानकारी गराइएको उनले बताए ।
