तिहारलाई लक्षित गरी लुम्बिनी प्रदेशमा यस वर्ष २७९ मेट्रिक टन फूल उत्पादन हुने भएको छ। प्रदेशका १२ वटै जिल्लामा गरी ५९ हेक्टर क्षेत्रफलमा फूलखेती गरिएको लुम्बिनी प्रदेश कृषि निर्देशनालयले जनाएको छ। उत्पादित फूलबाट करिब ७ करोड ५६ लाख रुपैयाँको कारोबार हुने अनुमान छ।
निर्देशनालयका अनुसार सयपत्री फूलको उत्पादन २५९ मेट्रिक टन हुने र त्यसबाट ६ करोड ९४ लाख ५३ हजार ५०० रुपैयाँ बराबरको कारोबार हुने प्रक्षेपण छ। मखमली फूल १८ दशमलव ५ मेट्रिक टन उत्पादन हुने र त्यसबाट करिब ६० लाख ५० हजार रुपैयाँको कारोबार हुने अनुमान गरिएको छ।
क्षेत्रफलका आधारमा कपिलवस्तु पहिलो स्थानमा छ। त्यहाँ २१ हेक्टरमा खेती गरी ४८ मेट्रिक टन उत्पादन हुने अनुमान छ। कारोबारका आधारमा भने दाङ अगाडि छ। दाङमा ८ दशमलव ८ हेक्टरमा ४८ दशमलव ५ मेट्रिक टन उत्पादन भई १ करोड ५२ लाख ३० हजार रुपैयाँको कारोबार हुने अनुमान छ। बाँके दोस्रो स्थानमा छ, जहाँ ३८ दशमलव ५ मेट्रिक टन उत्पादन र १ करोड ५१ लाख ७५ हजार रुपैयाँको कारोबार हुने देखिएको छ।
रुपन्देहीमा ४२ दशमलव ४५ मेट्रिक टन उत्पादन र १ करोड ४८ लाख ५७ हजार ५०० रुपैयाँको कारोबार हुने अनुमान छ। अन्य जिल्लामा पनि फूलखेती गरिएको छ। बर्दियामा सबैभन्दा कम ४ लाख ७१ हजार रुपैयाँको कारोबार हुने देखिएको छ।
कृषि प्रसार अधिकृत नवीन गैरेले व्यावसायिक फूलखेती बढ्दै गएकाले बाहिरबाट फूल आयात गर्नुपर्ने अवस्था निकै कम भएको बताए।
यसैबीच बुटवल उपमहानगरपालिका र सिद्धार्थनगर नगरपालिकाले प्लास्टिकजन्य फूलमालाको प्रयोग निरुत्साहित गर्दै स्थानीय उत्पादन प्रयोग गर्न नगरवासीलाई आग्रह गरेका छन्। बुटवलका प्रमुख खेलराज पाण्डेले स्थानीय उत्पादनको प्रयोगले किसान र स्थानीय अर्थतन्त्र दुवैलाई फाइदा पुग्ने बताए।
