कीर्तिपुरस्थित त्रिभुवन विश्वविद्यालयको मैदानमा शुक्रबार भएको नेपाल प्रिमियर लिगको दोस्रो खेलमा चितवन राइनोजले पोखरा एभेन्जर्ससामु १५२ रनको लक्ष्य प्रस्तुत गरेको छ। टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाएर १५१ रन बनाएको हो।
चितवनका लागि कप्तान सिकन्दर राजाले सर्वाधिक ३७ रन बनाए। उनले १६ बल खेल्दै २ चौका र ४ छक्का प्रहार गरे। रवि बोपाराले २८ बलमा ३ चौका र १ छक्कासहित ३५ रन जोडे। ओपनर अर्जुन साउदले २७ बलमा ३१ र डाविड मालानले २८ बलमा २८ रन बनाए।
साउद र मालानले पहिलो विकेटका लागि ६० रनको साझेदारी गर्दै चितवनलाई राम्रो सुरुवात दिलाएका थिए। तर दुवै ब्याटर लगातार आउट भएपछि चितवन ८६ रनमा ४ विकेट गुमाउने अवस्थामा पुगेको थियो। त्यसपछि बोपाराले कप्तान राजासँग पाँचौँ विकेटका लागि ६० रनको साझेदारी गरे।
अन्तिम ओभरमा पोखराका कप्तान चमिका करुणारत्नेले बोपारा र राजा दुवैलाई आउट गरे। कमल सिंह ऐरी २ रनमा अविजित रहे। डान मोस्ले २ र यस सिजन पहिलो खेल खेलिरहेका कुशल मल्ल ११ रनमा आउट भए।
पोखराका लागि करुणारत्ने, बिपिन खत्री र कुशल भुर्तेलले २–२ विकेट लिए। लगातार तीन हारपछि पोखराले कप्तान परिवर्तन गर्दै भुर्तेलको स्थानमा करुणारत्नेलाई जिम्मेवारी दिएको हो।
