रणवीर कपुर र यश अभिनीत बहुप्रतिक्षित पौराणिक चलचित्र ‘रामायण’ले हलमा आफ्नो दबदबा कायमै राखेको छ। प्रदर्शनको तेस्रो दिनका लागि गरिएको अग्रिम टिकट बिक्रीबाट मात्रै फिल्मले ४७ करोड ५ लाख भारतीय रुपैयाँ बराबरको ग्रस आम्दानी गरेको छ।
उपलब्ध तथ्यांकअनुसार फिल्मका लागि हालसम्म २२ हजार ५ सय ७२ वटा शो तय भएका छन् र ती शोका लागि १२ लाख १९ हजार ९ सय २४ थान टिकट बिक्री भइसकेका छन्। तेस्रो दिनका लागि मात्रै १२ लाखभन्दा बढी टिकट बिक्री भएकाले आइतबार स्पट बुकिङबाट पनि फिल्मले बक्स अफिसमा ठूलो रकम जम्मा गर्ने अनुमान गरिएको छ।
राज्यगत हिसाबले महाराष्ट्रमा सबैभन्दा धेरै अग्रिम बिक्री भएको छ। त्यहाँ १ लाख ७९ हजार ७ सय टिकट बिक्री हुँदा ९ करोड ८१ लाख रुपैयाँ संकलन भएको छ। अभिनेता यशको बलियो प्रभाव रहेको कर्नाटकमा १ लाख ६८ हजार ३ सय टिकट बिक्री भएर ८ करोड ५९ लाख रुपैयाँ जम्मा भएको छ। राष्ट्रिय राजधानी क्षेत्रमा भने ५ करोड १२ लाख रुपैयाँ बराबरको अग्रिम टिकट बिक्री भएको छ।
सहरका आधारमा मुम्बईमा २ करोड ३५ लाख रुपैयाँको अग्रिम व्यापार भएको छ। बेङ्गलोरका लागि दुईवटा फरक प्रतिवेदनमा २ करोड ६ लाख र १ करोड ९२ लाख रुपैयाँ उल्लेख गरिएको छ।
