राष्ट्रिय विपद् जोखिम न्यूनीकरण तथा व्यवस्थापन प्राधिकरणले भोटेकोशी बाढीमा हराएका दुई हजार दुई सय ९४ जनाको अन्तिम विवरण सार्वजनिक गरेको छ। जिल्ला विपद् व्यवस्थापन समितिहरूले पुष्टि गरेर पठाएका नामका आधारमा तयार पारिएको यो सूचीमा ३२ जिल्लाका नागरिक समेटिएका छन्।
सार्वजनिक विवरणमा सबैभन्दा धेरै क्षति रसुवामा देखिएको छ, जहाँ एक हजार पाँच सय ८३ जना अझै फेला परेका छैनन्। धनकुटा, डडेल्धुरा, खोटाङ, भोजपुर, अछाम, कपिलवस्तु, जाजरकोट, सर्लाही, ललितपुर, कैलाली, महोत्तरी, बागलुङ, ताप्लेजुङ, जुम्ला, बाजुरा, कालीकोट, नवलपरासी पूर्व र पश्चिम, उदयपुर, काभ्रेपलाञ्चोक, तेह्रथुम, रुकुम पूर्व, सप्तरी, बर्दिया, स्याङ्जा, रामेछाप, दाङ, सिन्धुपाल्चोक र सिन्धुलीका बेपत्ता व्यक्तिको नाम पनि सूचीमा छ। सात देशका एक सय ७१ विदेशी नागरिकको विवरणसमेत सार्वजनिक गरिएको छ।
प्राधिकरणले शुक्रबार जारी गरेको सूचनामा सूचीमा परेका कोही जीवित भेटिए वा फेला परेमा सम्बन्धित व्यक्ति वा परिवारका सदस्यले सात दिनभित्र दाबी पेस गर्न आग्रह गरेको छ। स्वदेशी नागरिकको सूची स्थायी ठेगाना रहेको स्थानीय तहको सिफारिस र जिल्ला समितिको निर्णयका आधारमा तयार भएको हो भने विदेशी नागरिकको विवरण सम्बन्धित देशको नियोगबाट कन्सुलर सेवा विभागमार्फत प्राप्त भएको हो।
अन्य जिल्ला र नियोगबाट थप विवरण आएपछि सूची अद्यावधिक गरिने प्राधिकरणले जनाएको छ। गत भदौ १० गते आएको बाढीमा हालसम्म एक हजार चार सय ५७ जनाको मृत्यु भएको छ भने पाँच हजार दुई सय ८५ जना बेपत्ता रहेको प्राधिकरणको तथ्याङ्क छ।
