सल्यान — सल्यानको शारदा नगरपालिकाले न्यूनतम विद्युत् शुल्क निःशुल्क गर्ने कार्यक्रम ल्याएको छ। आगामी २०८३ मङ्सिरदेखि लागू हुने यो सुविधाबाट ५ एम्पियर क्षमताको मिटर जडान गरेका करिब सात हजार दुई सय घरधुरी लाभान्वित हुनेछन्।
शुक्रबार शारदा नगरपालिका र नेपाल विद्युत् प्राधिकरणबीच यस सम्बन्धमा सम्झौता भएको छ। सम्झौताअनुसार मासिक २० युनिटसम्म विद्युत खपत गर्ने ५ एम्पियरका ग्राहकको न्यूनतम शुल्क नगरपालिकाले तिर्नेछ। हाललाई यो कार्यक्रम २०८४ असार मसान्तसम्म सञ्चालन हुनेछ।
नगर प्रमुख प्रकाश भण्डारीले विशेषगरी विपन्न तथा न्यून आय भएका नागरिकलाई लक्षित गरेर कार्यक्रम ल्याइएको बताए। उनका अनुसार सामान्य न्यूनतम शुल्क बुझाउनकै लागि सदरमुकामस्थित विद्युत कार्यालयसम्म पुग्नुपर्ने बाध्यताको अन्त्य गर्नु पनि कार्यक्रमको प्रमुख उद्देश्य हो।
उनले दुर्गम तथा दूरदराजका बस्तीका नागरिक न्यूनतम शुल्क बुझाउनकै लागि सदरमुकाम धाउन बाध्य रहेको बताए। सानो रकम तिर्न यातायात भाडा र अन्य खर्च गरेर कार्यालय पुग्नुपर्ने अवस्था हटाउने उद्देश्यले कार्यक्रम ल्याइएको उनको भनाइ छ।
कार्यक्रमको सुविधा लिन ५ एम्पियरको मिटर जडान गरेका नगरवासीले एक पटक मात्र आफ्नो सम्बन्धित वडा कार्यालयमा पुगेर निवेदन दिनुपर्नेछ। त्यसपछि मासिक २० युनिटसम्मको न्यूनतम विद्युत शुल्क भुक्तानीका लागि विद्युत कार्यालय धाउनुपर्ने छैन।
नगरपालिकाले यस कार्यक्रमबाट नागरिकको आर्थिक भार कम हुनुका साथै समय र यातायात खर्च गरेर सदरमुकाम पुग्नुपर्ने बाध्यता हट्ने अपेक्षा गरेको छ।
