काठमाडौँ — त्रिभुवन विश्वविद्यालयले आफ्ना मातहतका निकायलाई अधिकार दिने काम अघि बढाएको छ। विश्वविद्यालयले विकेन्द्रीकरणको सोचअनुसार तल्ला तहका निकायलाई जिम्मेवारी हस्तान्तरण गर्ने प्रक्रिया सुरु गरेको हो।
उपकुलपति प्रा. डा. भोला थापाका अनुसार विकेन्द्रीकरणसम्बन्धी नीतिगत निर्णय कार्यान्वयन गर्न विश्वविद्यालयअन्तर्गतका सबै निकायलाई पत्र पठाइसकिएको छ। आफू नियुक्त भएको चार महिनाभन्दा बढी अवधिमा विश्वविद्यालयको रूपान्तरणका लागि आवश्यक नीति तथा कार्यक्रम त्रिवि सभाबाट पारित गराइसकिएको उनले जानकारी दिए।
त्रिविले यस वर्षको दीक्षान्त समारोह सातवटै प्रदेशमा फरक ढङ्गले आयोजना गर्ने तयारी गरेको छ। यस वर्षको दीक्षान्त समारोहमा सहभागी हुन २१ हजार २७४ विद्यार्थीले निवेदन दिएका छन्।
परीक्षा प्रणाली र नतिजा प्रकाशनलाई व्यवस्थित बनाइएको उपकुलपतिले बताए। विश्वविद्यालयले शैक्षिक क्यालेन्डर कार्यान्वयनमा ल्याउनुका साथै समयमै परीक्षा सञ्चालन र उत्तरपुस्तिका परीक्षण गर्ने व्यवस्था मिलाएको छ। अहिले क्षेत्रीय परीक्षा नियन्त्रण कार्यालयमार्फत उत्तरपुस्तिका परीक्षण भइरहेको छ।
यसैबीच, अध्ययन बिदामा गएर नफर्किएका कर्मचारी तथा प्राध्यापकबाट त्रिविले हालसम्म २१ करोड रुपैयाँ असुल गरेको छ। विश्वविद्यालयको प्रशासनिक तथा शैक्षिक सुधारका लागि विभिन्न कदम चालिएको उपकुलपति थापाले बताए।
