पोखरामा सम्पन्न राष्ट्रिय जुनियर टेनिस प्रतियोगितामा चार खेलाडीले आआफ्नो उमेर समूहमा उपाधि जितेका छन्। शाश्वत बज्राचार्य, आर्यश राज पौडेल, निधय विक्रम राना र स्वरा थापा च्याम्पियन बनेका हुन्।
गण्डकी प्रदेश टेनिस सङ्घको आयोजना र कास्की जिल्ला टेनिस सङ्घको सहकार्यमा भएको प्रतियोगिताको यू–१८ ब्वाइज सिङ्गल्स फाइनलमा शाश्वत बज्राचार्यले असव सम्राट हाडालाई ६–२, ६–० को सोझो सेटमा हराए।
यू–१४ ब्वाइज सिङ्गल्समा आर्यश राज पौडेलले अभिषेक बायलकोटीलाई ६–०, ६–१ ले पराजित गरे भने यू–१२ ब्वाइज सिङ्गल्समा निधय विक्रम रानाले इभान भट्टराईलाई ६–१, ६–४ को सेटमा हराउँदै उपाधि हात पारे।
यू–१४ गल्र्स सिङ्गल्सको फाइनल भने निकै प्रतिस्पर्धात्मक बन्यो। स्वरा थापाले एरा खत्रीलाई ६–१, २–६, ६–३ को सेटमा हराउँदै च्याम्पियन बनिन्।
विजेता तथा उपविजेता खेलाडीलाई मुख्य प्रायोजक ट्रयाङ्क्युलिटी स्पाका एरिया कोअर्डिनेटर प्रमिला थापा, आयोजक सङ्घका अध्यक्ष विनोद कायस्थ, प्रतियोगिता संयोजक लोकबहादुर गुरुङ, कास्की जिल्ला टेनिस सङ्घका उपाध्यक्ष नवीन श्रेष्ठ र सचिव भीष्मराज पौडेलले पदक, ट्रफी, प्रमाणपत्र र उपहार प्रदान गरे।
आयोजकका अनुसार प्रतियोगिताले युवा खेलाडी उत्पादन र टेनिसको विकासमा योगदान पुर्याएको छ। पछिल्लो तीन वर्षमा सङ्घबाट प्रशिक्षण लिएका एक दर्जनभन्दा बढी खेलाडी राष्ट्रिय जुनियर वरियतामा परेका छन् भने केहीले अन्तरराष्ट्रिय प्रतियोगितामा समेत नेपालको प्रतिनिधित्व गरिसकेका छन्।
गत कात्तिक १८ गतेदेखि सुरु भएको प्रतियोगितामा पोखरासहित विभिन्न जिल्लाका ४३ खेलाडी सहभागी थिए।
