काठमाडौँ — तिहार र छठ पर्वलाई लक्षित गर्दै स्वदेशी तथा स्थानीय उत्पादनको प्रवर्द्धनका लागि थापाथलीमा विशेष मेला सुरु भएको छ। खाद्य व्यवस्था तथा व्यापार कम्पनी लिमिटेडले आयोजना गरेको यो मेलाको उद्घाटन उद्योग, वाणिज्य तथा आपूर्तिमन्त्री दीपक साहले गर्नुभएको हो।
कम्पनीको थापाथलीस्थित कार्यालय परिसरमा आजदेखि सुरु भएको मेला कात्तिक २३ गतेसम्म चल्नेछ। कम्पनीका प्रवक्ता माधव मिश्रका अनुसार मेला अहिले तीन दिनका लागि आयोजना गरिएको भए पनि आगामी दिनमा प्रत्येक शनिबार र आइतबार नियमित बजारका रूपमा सञ्चालन गर्ने तयारी भइरहेको छ।
मेलामा तिहार र छठमा प्रयोग हुने परम्परागत खाद्यवस्तु, सांस्कृतिक सामग्री, कृषि उपज तथा हस्तकलाका सामग्रीसहित विभिन्न स्वदेशी उत्पादन प्रदर्शनी र बिक्रीका लागि राखिएका छन्। आयोजकका अनुसार यसले स्थानीय उत्पादनलाई बजारसँग जोड्ने, नेपाली उद्यमी र उत्पादकलाई प्रोत्साहन गर्ने तथा स्वदेशी वस्तुको उपभोग बढाउने लक्ष्य राखेको छ।
कम्पनीले ‘स्थानीय उत्पादन किनौँ, नेपाली उद्यमलाई चिनौँ र स्वदेशी अर्थतन्त्रलाई बलियो बनाऔँ’ भन्ने सन्देशसहित सर्वसाधारणलाई मेलामा सहभागी हुन आह्वान गरेको छ।
