पोखरामा यस वर्षको तिहार विशेष ढंगले मनाइने भएको छ। तिहारको मौलिकता, परम्परा र सांस्कृतिक महत्व पर्यटकसामु पुर्याउने उद्देश्यले पोखरामा मौलिक देउसी–भैलो उत्सव आयोजना हुने भएको हो।
पोखरा पर्यटन परिषद्, पोखरा महानगरपालिका र पब्लिक फोरके टेलिभिजनको संयुक्त आयोजनामा हुने उत्सव कात्तिक २३ गते सोमबार गाईपूजाका दिन पोखरा–६, लेकसाइडस्थित गौरीघाटमा हुनेछ। आयोजकले शनिबार पत्रकार सम्मेलन गरेर कार्यक्रमबारे जानकारी दिएका हुन्।
उत्सवमा करिब नौ समूहले परम्परागत पोसाकमा सजिएर दे�उसी–भैलो प्रस्तुत गर्नेछन्। प्रत्येक समूहले १० देखि १७ मिनेटभित्र आफ्नो प्रस्तुति राख्नेछन्। प्रस्तुतिको मूल्याङ्कन मौलिकता, परम्परागत भाका, शब्द, लय, ताल, भेषभूषा र सांस्कृतिक प्रस्तुतिका आधारमा गरिने आयोजकले जनाएका छन्। प्रत्येक टिमलाई दक्षिणास्वरूप पाँच हजार पाँच सय ५५ रुपैयाँ दिइनेछ भने विजेता समूहले २५ हजार रुपैयाँ पाउनेछ।
कार्यक्रमस्थलमा सेलरोटी र सयपत्री फूलका स्टल रहनेछन् भने स्थानीय कलाकारहरूको सांगीतिक प्रस्तुति पनि हुनेछ। काग, गाई र गोरुको पूजा किन गरिन्छ, देउसी–भैलो किन खेलिन्छ र सप्तरंगी टीका किन लगाइन्छ भन्ने कुरा एउटै मञ्चबाट बुझ्न सकिने आयोजकको भनाइ छ।
पोखरा पर्यटन परिषद्का अध्यक्ष हरि भुजेलले चाडपर्वलाई पर्यटनसँग जोड्दा त्यसको महत्व झनै बढ्ने बताए। उनका अनुसार नयाँ वर्षमा पोखरा जाने चलन स्थापित भइसकेको छ र तिहारलाई पनि त्यसैगरी मनाउन लागिएको हो। महानगरपालिकाका आर्थिक विकास महाशाखा प्रमुख मनहर कडरियाले यस्ता कार्यक्रमले परम्परागत संस्कृतिको संरक्षणमा महत्वपूर्ण भूमिका खेल्ने बताए। पब्लिक फोरके टेलिभिजनका प्रबन्ध निर्देशक मन क्षेत्रीले नयाँ पुस्ताले आफ्नो संस्कृति बुझ्ने अवसर पाउने बताए भने परिषद्का महासचिव मिलन तिवारीले कार्यक्रम सम्पन्न गर्न करिब पाँच लाख रुपैयाँ खर्च लाग्ने अनुमान गरिएको जानकारी दिए।
