ताप्लेजुङ — पूर्वी नेपालको प्रसिद्ध धार्मिक स्थल पाथीभरा पुग्ने भक्तजनको सङ्ख्या दिनप्रतिदिन बढिरहेको छ। दसैँपछि दैनिक दश हजारभन्दा बढी तीर्थालुले मन्दिर पुगेर पूजाआजा गरिरहेका छन्। पाथीभरा क्षेत्र विकास समितिका अनुसार गत मङ्गलबार यस वर्षकै सबैभन्दा धेरै, करिब ११ हजार भक्तजन पाथीभरामा पुगेका थिए।
नेपालका विभिन्न जिल्लाका साथै छिमेकी भारतबाट पनि दैनिक हजारौँ दर्शनार्थी ताप्लेजुङ आइरहेका छन्। तर मन्दिरसम्म पुग्नुपर्ने लामो र कठिन उकालो यात्राले धेरैलाई हैरान बनाएको छ। तल्लो फेदीबाट यात्रा थालेर ठूलो फेदी हुँदै मन्दिरसम्म पुग्नुपर्ने भएकाले विशेषगरी ज्येष्ठ नागरिक, बालबालिका र शारीरिक रूपमा अशक्त व्यक्तिलाई दर्शन गर्न गाह्रो हुने गरेको छ।
यही कठिनाइ कम गर्न दर्शनार्थीहरूले रोकिएको केबलकार निर्माण चाँडो अघि बढाउन माग गरेका छन्। केबलकार सञ्चालनमा आएपछि ज्येष्ठ नागरिक र अशक्त व्यक्तिले पनि सहजै देवीको दर्शन गर्न सक्ने उनीहरूको विश्वास छ।
पाथीभरा देवी दर्शन प्रालिले निर्माण गरिरहेको केबलकारको करिब ६० प्रतिशत काम पूरा भइसकेको छ। तर तत्कालीन स्थानीय प्रशासनको मौखिक आदेशपछि निर्माण थन्किएको छ, र काम कहिले फेरि सुरु हुन्छ भन्नेमा आयोजनाले स्पष्ट जानकारी दिएको छैन।
केबलकारले दर्शनार्थीको सङ्ख्या बढाउने मात्र होइन, ताप्लेजुङको पर्यटन, व्यापार र समग्र आर्थिक गतिविधिमा सकारात्मक प्रभाव पार्ने स्थानीयको विश्वास छ। कञ्चनजङ्घा हिमशृङ्खलाको दृश्य र प्राकृतिक सौन्दर्य हेर्न आउने पर्यटकका लागि आवश्यक पूर्वाधार विकास गर्न सरकार, स्थानीय प्रशासन र आयोजनाको ध्यानाकर्षण गराउन तीर्थालु तथा स्थानीयवासीले आग्रह गरेका छन्।
