काठमाडौँ । औषधि व्यवस्था विभागले ललितपुरका सामुदायिक फार्मेसीहरूमा गरेको छड्के अनुगमनमा अधिकांश फार्मेसीले चिकित्सकको प्रेस्क्रिप्सनबिना नै प्रतिजैविक औषधि बिक्री गरिरहेको पाइएको छ। विभागले अनुगमन गरेका १६ वटा फार्मेसीमध्ये १३ वटामा यस्तो नियमविपरीतको बिक्री भइरहेको भेटिएको हो।
विभागका महानिर्देशक भरत भट्टराईका अनुसार अनुगमनका क्रममा प्रतिजैविक औषधिको दुरुपयोग भइरहेको स्पष्ट देखिएको छ। १६ वटा फार्मेसीमध्ये १३ वटाले चिकित्सकको सिफारिसबिना नै एन्टीबायोटिक ओभर द काउन्टर बिक्री गरिरहेका थिए।
बिनाप्रेस्क्रिप्सन एन्टीबायोटिक बिक्री गर्ने फार्मेसीमा महालक्ष्मी–१ स्थित अन्विका फार्मेसी, भर्टेक्स फार्मेसी र इजी फार्मेसी रहेका छन्। त्यस्तै, ललितपुर महानगरपालिका–१५ स्थित विश्वास फार्मेसी तथा वडा नम्बर २, ३, ४ र ७ मा रहेका केही फार्मेसीमा पनि यस्तै अवस्था भेटिएको विभागले जनाएको छ।
महानिर्देशक भट्टराईले नियमविपरीत एन्टीबायोटिक बिक्री गर्ने फार्मेसीमाथि कानुनी कारबाही गरिने बताएका छन्। चिकित्सकको सिफारिसबिना प्रतिजैविक औषधि सेवन गर्दा शरीरमा औषधिप्रति प्रतिरोध क्षमता विकास हुने र पछि रोग निको पार्न औषधिले काम नगर्ने जोखिम हुने चिकित्सकहरूले बताउँदै आएका छन्।
