दसैँ, तिहार र छठ पर्वलाई शान्तिपूर्ण तथा सुरक्षित रूपमा मनाउन रौतहटमा विशेष सुरक्षा योजना लागू गरिएको छ। जिल्ला प्रहरी कार्यालय रौतहटले चाडपर्वको समयमा हुन सक्ने अपराध, चोरी, लुटपाट, ठगी र सवारी दुर्घटना रोक्न ट्राफिक प्रहरीसहित कुल ८९७ जना प्रहरी परिचालन गर्ने तयारी गरेको छ।
जिल्ला प्रहरी कार्यालयका प्रवक्ता प्रहरी नायब उपरीक्षक वसन्त गौतमले प्रेस विज्ञप्ति जारी गर्दै नागरिकको सुरक्षाका लागि विशेष योजना तयार पारिएको जानकारी दिएका छन्। योजनाअनुसार जिल्लाका संवेदनशील क्षेत्र, मुख्य बजार, धार्मिक तथा सांस्कृतिक स्थल, मेला र भीडभाड हुने ठाउँमा विशेष निगरानी गरिनेछ। त्यसका लागि गस्ती, पिकेट, मोबाइल गस्ती, पैदल गस्ती, बजार अनुगमन, यात्रु सहायता कक्ष, ड्रोन निगरानी र स्वीप अपरेसनसहित २० प्रकारका सुरक्षा गतिविधि सञ्चालन गरिनेछ।
जिल्लाभर ३४ स्थानमा पिकेट र २० स्थानमा पैदल गस्ती टोली खटाइनेछ भने संवेदनशील स्थानमा १४ वटा मोबाइल गस्ती परिचालन गरिनेछ। सीसीटीभी क्यामेरा र ड्रोनलाई एकीकृत गरी २४ घण्टा निगरानीको व्यवस्था मिलाइने प्रहरीले जनाएको छ।
चाडपर्वमा आर्थिक कारोबार बढ्ने भएकाले बैंक तथा वित्तीय संस्था र सुनचाँदी पसलमा विशेष सुरक्षा दिइनेछ। मादक पदार्थ सेवन गरी सवारी चलाउने, क्षमताभन्दा बढी यात्रु बोक्ने र लापरवाहीपूर्वक सवारी चलाउने प्रवृत्ति नियन्त्रण गर्न ट्राफिक प्रहरीसहित १० स्थानमा संयुक्त चेकजाँच गरिनेछ।
चोरी, पाकेटमारी र ठगी नियन्त्रणका साथै अदालतबाट फैसला भई फरार रहेका प्रतिवादी पक्राउ गर्न सादा पोसाकमा समेत प्रहरी परिचालन गरिनेछ। भारतबाट चाडपर्व मनाउन नेपाल आउने नागरिक ठगीमा पर्न सक्ने सम्भावनालाई ध्यानमा राख्दै भारतीय सीमावर्ती प्रहरी इकाइसँग समन्वय गरिनेछ। नागरिकको सहज आवागमनका लागि जिल्लाका पाँच स्थानमा यात्रु सहायता कक्ष स्थापना गरिनेछ।
सीमावर्ती क्षेत्रमा पटाका तथा अन्य अवैध सामग्रीको ओसारपसार नियन्त्रण गर्न तालिमप्राप्त कुकुरसहित प्रहरी चेकिङ परिचालन गरिनेछ। सामाजिक सञ्जालमार्फत फैलिन सक्ने अफवाह र भ्रमपूर्ण सूचनाको समेत २४ घण्टा निगरानी गरिनेछ।
आपत्कालीन अवस्थामा प्रहरी कन्ट्रोल नम्बर १००, सञ्चार नम्बर ९८५५०९०३७४, सूचना अधिकारी ९८५५०४०६०७ तथा कार्यालय प्रमुखको मोबाइल ९८५५०३५५५५ मा सम्पर्क गर्न सकिने प्रहरीले जनाएको छ।
