काठमाडौँ । ओमानमा जारी एसीसी यू–१९ एसिया कपमा नेपालले आफ्नो दोस्रो खेलमा निराशाजनक ब्याटिङ प्रदर्शन गरेको छ । संयुक्त अरब इमिरेट्स (यूएई) विरुद्धको खेलमा नेपाली टोली ४१ ओभरमा १५३ रनमै अलआउट भयो ।
टस गुमाएर पहिले ब्याटिङको जिम्मेवारी पाएको नेपालले सुरुआती ओभरदेखि नै विकेट गुमाउन थाल्यो । ब्याट्सम्यानहरूले पारी सम्हाल्न सकेनन् र निर्धारित ५० ओभर पूरा हुनुअघि नै पूरै टोली प्याभिलियन फर्कियो ।
नेपालका लागि सोहेल कुँवरले सर्वाधिक ३३ रन बनाए । सचिन भट्टले ३२ रनको योगदान दिए भने दर्श सोनार र निरज यादवले समान १६–१६ रन बनाए । आशिष लुहारले ११ रन जोडे । अन्य ब्याट्सम्यानले उल्लेखनीय स्कोर बनाउन सकेनन् ।
यूएईका बलरहरूले भने नेपालको ब्याटिङ लाइनअपलाई बाँध्न सफल भए । नसीम खानले एक्लै पाँच विकेट लिए भने अयान मिसबाहले तीन र नूरउल्लाह अयोबीले दुई विकेट लिए ।
प्रतियोगिताको पहिलो खेलमा नेपाल भारतसँग पराजित भएको थियो । लगातार दोस्रो खेलमा पनि ब्याटिङ कमजोरी देखिएपछि नेपालको अघिल्लो चरणको यात्रा कठिन बन्दै गएको छ ।
