कर्णाली प्रदेशमा आयोजना हुने दशौं राष्ट्रिय खेलकुदका प्रतिस्पर्धा मंसिर ८ गतेदेखि सुरु हुने भएका छन् । प्रतियोगिताको प्राविधिक समितिले अनुमोदन गरेको तालिकाअनुसार पहिलो दिनदेखि नै छ वटा खेलका खेलाडी मैदानमा उत्रनेछन् ।
सुरु हुने खेलमा पुरुष तथा महिला क्रिकेट, पुरुष फुटबल, पुरुष तथा महिला ह्यान्डबल, महिला बास्केटबल, टेनिस र पौडी रहेका छन् । प्रतियोगिताका कुल ३२ खेलमध्ये २३ वटा सुर्खेतमै खेलाइने तय भएको छ । सुर्खेतमा एथ्लेटिक्स, क्रिकेट, फुटबल, हक्की, भलिबल, कबड्डी, कराते, ब्याडमिन्टन, फुल कन्ट्याक्ट कराते, टेबल टेनिस, उसु, तेक्वान्दो, जिम्न्यास्टिक, बक्सिङ, ह्यान्डबल, स्क्वास, बास्केटबल, आर्चरी, भारत्तोलन, रग्बी, साइक्लिङ, ईस्पोर्ट्स र सेपाकताक्रोका प्रतिस्पर्धा हुनेछन् ।
बाँकी खेल प्रदेशका अन्य जिल्ला र लुम्बिनीका दुई जिल्लामा बाँडिएका छन् । टेनिस र खो खो बर्दियामा, जुडो र कुस्ती सल्यानमा, शारीरिक सुगठन पश्चिम रुकुममा, आईटीएफ टेक्वान्दो दैलेखमा, बुद्धिचाल कालिकोटमा तथा पौडी र सुटिङ नेपालगञ्जमा खेलाइने भएको छ ।
कर्णालीका हुम्ला, जुम्ला, जाजरकोट, मुगु र डोल्पामा भने कुनै पनि खेल राखिएको छैन । प्रतियोगिताको औपचारिक उद्घाटन मंसिर १६ गते सुर्खेत रंगशालामा हुनेछ भने समापन समारोह मंसिर २७ मा तय गरिएको छ ।
