त्रिभुवन विश्वविद्यालय चिकित्सा शास्त्र अध्ययन संस्थानले एमबीबीएस, बीडीएस तथा सबै १५ वटा डीएम र एमसीएच कार्यक्रमका पाठ्यक्रम परिमार्जन गरेको छ । चिकित्सा शिक्षाको गुणस्तर, सान्दर्भिकता र समयअनुकूल विकासलाई केन्द्रमा राखेर पाठ्यक्रम अद्यावधिक गरिएको संस्थानका डीन प्रा.डा. मोहन राज शर्माले बताए ।
परिमार्जित पाठ्यक्रम त्रिभुवन विश्वविद्यालयको प्राज्ञिक परिषद्बाट स्वीकृत भइसकेका छन् । यसअन्तर्गत स्नातक तहका एमबीबीएस र बीडीएसका साथै नौ वटा डीएम र छ वटा एमसीएच गरी अति विशिष्टीकृत तहका सबै १५ कार्यक्रमका पाठ्यक्रम संशोधन गरिएको हो । स्नातकदेखि अति विशिष्टीकृत तहसम्मका महत्वपूर्ण कार्यक्रमको पाठ्यक्रम एकै वर्षमा परिमार्जन हुनु शैक्षिक सुधारप्रतिको प्रतिबद्धता भएको डीन शर्माको भनाइ छ ।
नयाँ पाठ्यक्रमले विद्यार्थीमा सैद्धान्तिक ज्ञानसँगै चिकित्सकीय तथा प्रक्रियागत सीप, सञ्चार क्षमता, व्यावसायिकता, नैतिकता, अनुसन्धान क्षमता र स्वास्थ्य प्रणालीसम्बन्धी व्यावहारिक दक्षता विकास गर्ने लक्ष्य राखेको छ । विद्यार्थीकेन्द्रित शिक्षण विधि, आधुनिक प्रविधि र क्लिनिकल अभ्यासबीचको समन्वयलाई थप बलियो बनाइएको छ ।
एमबीबीएस पाठ्यक्रममा अनुसन्धान विधिशास्त्रलाई महत्वपूर्ण विषयका रूपमा समावेश गरिएको छ भने आन्तरिक चिकित्साअन्तर्गत जेरियाट्रिक मेडिसिन थपिएको छ । सञ्चार सीप, सूचना प्रविधि, कृत्रिम बौद्धिकता, चिकित्सकीय नैतिकता तथा आधुनिक शिक्षण–सिकाइ विधिलाई विशेष महत्व दिइएको छ । निरन्तर मूल्यांकनलाई सुदृढ गर्दै सैद्धान्तिक तथा प्रयोगात्मक दुवै परीक्षामा कुल प्राप्तांकको कम्तीमा ३० प्रतिशत भार तोकिएको छ ।
बीडीएस पाठ्यक्रममा दक्षतामा आधारित शिक्षण प्रणाली अपनाइएको छ । दन्त चिकित्सासम्बन्धी व्यावहारिक सीप, व्यावसायिकता, सञ्चार क्षमता, नैतिकता र नयाँ प्रविधिको प्रयोगमा जोड दिइएको छ । मनोचिकित्सालाई छुट्टै विषयका रूपमा समावेश गर्नुका साथै निरन्तर तथा निर्माणात्मक मूल्यांकन प्रणालीलाई थप महत्व दिइएको छ ।
