वैदेशिक रोजगारीका लागि इजरायल पठाउने लोभ देखाएर ठगी गरेको घटनाका मुख्य आरोपी भरत चौलागाईंलाई अदालतले पुर्पक्षका लागि थुनामा राख्न आदेश दिएको छ । थुनछेकपछि काठमाडौं जिल्ला अदालतले शुक्रबार चौलागाईंलाई थुनामा पठाउने आदेश गरेको हो ।
अदालतको आदेशअनुसार उनलाई डिल्लीबजार कारागार चलान गरिएको केन्द्रीय अनुसन्धान ब्युरोका एक अधिकृतले बताए । रामेछापको सुनापति गाउँपालिका–१ का चौलागाईं प्रधानमन्त्रीका प्रमुख सल्लाहकार कुमार बेनको नाम दुरुपयोग गरेर ठगी गरेको आरोपमा पक्राउ परेका थिए । उनी नेपाली कांग्रेसका निवर्तमान महाधिवेशन प्रतिनिधि हुन् । प्रहरीले उनलाई असोज १ गते पक्राउ गरेको थियो ।
सोही प्रकरणमा पक्राउ परेका अन्य चार जनालाई भने अदालतले धरौटीमा रिहा गर्न आदेश दिएको छ । दोलखा घर भएकी बालिका शिवाकोटीलाई एक लाख, ज्ञानबहादुर कार्कीलाई दुई लाख ५० हजार, शिवराम श्रेष्ठलाई दुई लाख ५० हजार र दीपेन्द्रसिंह सामन्तलाई एक लाख ५० हजार रुपैयाँ धरौटी तोकिएको छ ।
प्रहरी अनुसन्धानले आरोपीहरूले केयर गिभरको रोजगारीका लागि इजरायल पठाउने भन्दै दुई करोड ५० लाख रुपैयाँ ठगी गरेको देखाएको छ । दोलखाको कालिन्चोक गाउँपालिका–८ घर भएकी ३२ वर्षीया बालिका शिवाकोटीले आफूले संकलन गरेको रकममध्ये डेढ करोड रुपैयाँ नगद भरत चौलागाईंलाई दिएको बयान दिएकी थिइन् ।
नेपालबाट इजरायलमा कामदार पठाउन सरकारले सन् २०२४ मा परीक्षा लिएको थियो । लक्की ड्रमार्फत दुई हजार ९९ जना छानिएका थिए । त्यतिबेला लक्की ड्रमार्फत नपरेका १५६ जनालाई ‘हामी पठाइदिन सक्छौं’ भनेर चौलागाईंको समूहले रकम असुलेको प्रहरीको निष्कर्ष छ ।
