ओमनमा जारी एसीसी यू–१९ एसिया कपमा नेपालले लगातार दोस्रो हार व्यहोरेको छ। समूह चरणको दोस्रो खेलमा नेपाल संयुक्त अरब इमिरेट्स (यूएई) सँग सात विकेटले पराजित भएको हो।
अल अमेरात मैदानमा टस जितेर फिल्डिङ रोजेको यूएईविरुद्ध पहिला ब्याटिङ गरेको नेपाल ४१ ओभरमा सबै विकेट गुमाएर १५३ रनमा समेटियो। नेपालका लागि सोहिल कुँवर र सचिन भट्टले समान ३३–३३ रन बनाए। निरजकुमार यादव र दर्सन सोनारले १६–१६ रन जोडे पनि अन्य ब्याट्सम्यानले उल्लेख्य योगदान दिन सकेनन्।
नेपाललाई सस्तैमा रोक्न यूएईका निशम खानले पाँच विकेट लिए। आयन मिसवाहले तीन र नुरुल्लाह अयोबीले दुई विकेट हात पारे।
१५४ रनको लक्ष्य पछ्याएको यूएईले ४४ ओभर ४ बलमा तीन विकेट गुमाएर १५८ रन बनाउँदै जित निकाल्यो। कप्तान अयान मिस्बाहले १०४ बलमा नटआउट ७५ रनको अर्धशतकीय इनिङ्स खेले। अहमद खुदादादले २४ र यलिन किरण राईले ३२ रन बनाए। नेपालका सुशील रावल, नितिज पट्टेल र बिपिन शर्माले एक–एक विकेट लिए।
पहिलो खेलमा नेपाल भारतसँग १० विकेटले पराजित भएको थियो। भारतले नेपालले दिएको १२९ रनको लक्ष्य १९ ओभर १ बलमा कुनै विकेट नगुमाई पूरा गरेको थियो। दुई खेलमा पराजित नेपाल समूह ‘ए’ मा अंकबिहीन छ। भारत, पाकिस्तान र यूएईले दुई–दुई अंक जोडेका छन्। नेपालले समूह चरणको अन्तिम खेलमा मंगलबार पाकिस्तानको सामना गर्नेछ।
