गत भदौ १० गते रसुवा–भोटेकोशी नदीमा आएको विनाशकारी बाढीले थिलथिलो बनाएको वित्तीय क्षेत्रलाई पुरानै अवस्थामा फर्काउन ६५ अर्ब २१ करोड ५७ लाख रुपैयाँ लाग्ने प्रारम्भिक अनुमान सार्वजनिक भएको छ। राष्ट्रिय योजना आयोगले तयार पारेको क्षति तथा विपद्पछिको आवश्यकता मूल्यांकनको प्रारम्भिक विवरणमा उक्त रकम उल्लेख गरिएको छ।
आयोगको मूल्यांकनअनुसार सार्वजनिक क्षेत्रको कुल हानि–नोक्सानी ३ अर्ब ७ करोड ५५ लाख रुपैयाँ छ भने निजी क्षेत्रको कुल हानि–नोक्सानी ६१ अर्ब ९५ करोड ५५ लाख रुपैयाँ बराबर छ। पुनर्स्थापनाको लागत हानि–नोक्सानीभन्दा करिब २१ करोड रुपैयाँ बढी देखिएको छ।
बाढी प्रभावित क्षेत्रमा १२ वटा बैंकका १७ वटा शाखा कार्यालय थिए। तीमध्ये १५ वटा शाखामा पूर्ण क्षति पुगेको छ भने एउटा शाखा क्षतिग्रस्त अवस्थामा छ। ती शाखामा रहेका निक्षेपकर्ताको संख्या ७८ हजार २ सय ४ रहेको नेपाल बैंकर्स संघले जनाएको छ। प्रभावित शाखामा बैंकहरूले २ अर्ब ४३ करोड रुपैयाँ कर्जा लगानी गरेका थिए भने कुल निक्षेप ४ अर्ब ५० करोड रुपैयाँ छ। ऋणीको संख्या २ हजार १ सय २५ रहेको छ।
सबैभन्दा ठूलो क्षति कृषि विकास बैंकको देखिएको छ। बैंकको त्रिशूली शाखा पूर्णरूपमा क्षतिग्रस्त भएको थियो। उक्त शाखामा ६४ वटा लकर बक्स प्रयोगमा रहेकाले ग्राहकको सम्पत्तिमा समेत क्षति पुगेको छ। लकरमा भएको सामानको बीमा नहुने भएकाले उक्त नोक्सानी लकर प्रयोगकर्ता ग्राहकले मात्रै व्यहोर्नुपर्ने भएको छ।
