युवालाई जागिर खोज्ने होइन, अरूलाई समेत रोजगारी दिने उद्यमी बनाउने उद्देश्यसहित ‘स्टार्टअप नेपाल समिट–२०२६’ को सातै प्रदेश जोड्ने अभियानअन्तर्गत गण्डकी प्रदेशको कार्यक्रम पोखरामा सम्पन्न भएको छ।
कार्यक्रमको उद्घाटन गर्दै गण्डकी प्रदेशका मुख्यमन्त्री सुरेन्द्रराज पाण्डेले स्टार्टअप तथा उद्यमशीलता प्रवर्द्धनका नाममा दिइने सरकारी अनुदानको प्रभावकारिता र सदुपयोगमा ध्यान दिनुपर्ने बताए। विगतमा विभिन्न शीर्षकमा अनुदान वितरण भए पनि अपेक्षाअनुसार उपलब्धि हासिल हुन नसकेको उल्लेख गर्दै उनले अनुदानलाई उत्पादन र वास्तविक नतिजासँग जोड्नुपर्ने बताए।
‘अनुदान वा सहयोग प्राप्त गर्नु मात्रै ठुलो कुरा होइन, त्यसलाई सदुपयोग गरेर उत्पादन र रोजगारीमा परिणाम देखाउन सक्नुपर्छ,’ उनले भने।
नेपालका लागि पाकिस्तानी राजदूत मोहम्मद अमिर खानले युवाको भविष्य स्टार्टअप, प्रविधि र नवप्रवर्तनसँग जोडिएको बताए। नयाँ सोचलाई प्रविधिसँग जोडेर व्यावसायिक स्वरूप दिन सके आफ्नै देशमा प्रशस्त अवसर सिर्जना गर्न सकिने उनको भनाइ छ।
पोखरा महानगरपालिकाका मेयर धनराज आचार्यले स्टार्टअप देशको आवश्यकता भएको बताए। नवीन सोच र सिर्जनात्मक विचारलाई व्यवसायमा रूपान्तरण गरी रोजगारी सिर्जना गर्नु नै स्टार्टअपको मुख्य उद्देश्य हुनुपर्नेमा उनको जोड छ।
कार्यक्रममा स्टार्टअप समिट नेपाल–२०२६ की अध्यक्ष शोभा ज्ञवालीले युवालाई विदेश जानबाट रोक्ने भाषणभन्दा पनि नेपालमै अवसर सिर्जना गर्नु अहिलेको आवश्यकता भएको बताइन्। ‘हामीले युवालाई जागिर खोज्ने होइन, जागिर सिर्जना गर्ने उद्यमी बनाउने अभियान सुरु गरेका हौँ। विदेश पलायन हुन खोजिरहेको दक्ष जनशक्तिको ज्ञान, सीप र क्षमतालाई नेपालमै उपयोग गर्न सकियो भने देशभित्रै रोजगारी र आर्थिक समृद्धिको आधार तयार गर्न सकिन्छ,’ उनले भनिन्। ‘नेपालमा बसौँ, नेपालमै उत्पादन गरौँ र रोजगारी सिर्जना गरौँ’ भन्ने नारासहित आयोजित समिटले स्थानीय स्रोतसाधनको उपयोग, नयाँ व्यवसायको विकास, लगानीको पहुँच र युवा पलायन न्यूनीकरणलाई मुख्य प्राथमिकतामा राखेको छ।
