काभ्रेपलाञ्चोक । नेपाली कांग्रेसका वरिष्ठ उपसभापति विश्वप्रकाश शर्माले पार्टीको महाधिवेशनमा पैसाको चलखेल भएको भन्ने हल्ला निराधार रहेको बताएका छन् । सोमबार कांग्रेस काभ्रेपलाञ्चोक जिल्ला कार्यसमितिले आयोजना गरेको कार्यक्रममा बोल्दै उनले सामाजिक सञ्जालमा फैलिएका अपुष्ट दाबीका भरमा प्रश्न उठाउनु उचित नहुने धारणा राखे ।
कुनै बिचौलियाले भनेकै आधारमा करोडौँ रुपैयाँ लेनदेन भएको निष्कर्षमा पुग्न नहुने उनको भनाइ थियो । आफू र गगन थापाले पार्टीको नेतृत्व परिवर्तनका लागि करोडौँ रुपैयाँ बुझाएको भन्ने आरोपलाई उनले अस्वीकार गरे । पटक–पटक सत्तामा पुगेका नेताहरूको राजनीतिक तथा आर्थिक हैसियतसँग आफूहरूको तुलना गरेर हेर्न उनले आग्रह गरे ।
राष्ट्रिय आवश्यकता र बदलिँदो परिस्थितिअनुसार कांग्रेसलाई नयाँ सोच, ऊर्जा र दिशासहित अघि बढाउनुपर्ने र अध्ययन, मिहिनेत, एकता तथा योजनाका साथ समृद्धिका लागि काम गर्नुपर्ने उनले बताए ।
कुनै आपराधिक घटनामा पक्राउ परेको व्यक्तिले कसैको नाम जोडेर अभिव्यक्ति दिँदैमा त्यसलाई अदालत वा कानुनले सीधै प्रमाणका रूपमा स्वीकार नगर्ने उनले स्पष्ट पारे । कार्यकर्तालाई सामाजिक सञ्जालका अपुष्ट दाबीको पछि नलाग्न उनले सचेत गराए ।
शर्माले विशेष महाधिवेशनदेखि १५औँ महाधिवेशनसम्मका सबै प्रक्रिया पार्टीको विधि, विधान र पद्धतिअनुसार सम्पन्न भएको दाबी गरे । महाधिवेशन प्रतिनिधिहरूको निर्णय नै अन्तिम हुने भन्दै उनले यस विषयमा अनावश्यक भ्रम सिर्जना नगर्न आग्रह गरे ।
काभ्रे कांग्रेसलाई सङ्गठन विस्तार र सुदृढीकरणमा केन्द्रित हुन निर्देशन दिँदै उनले अनुभवी नेतृत्व र युवा पुस्ताको सहकार्यमा पार्टीलाई गाउँ, टोल र जनताको घरदैलोसम्म पुर्याउनुपर्ने बताए । कार्यकर्तामा आशा र आत्मविश्वास जगाउन सके मात्र समाजमा नयाँ विश्वास स्थापित गर्न सकिने उनको भनाइ थियो ।
