वासिङ्टन । अमेरिकी राष्ट्रपति डोनाल्ड ट्रम्पले भर्खरै सम्पन्न मध्यावधि निर्वाचनमा रिपब्लिकन पार्टीले बेहोरेको पराजयका चार मुख्य कारण खुलाएका छन्। उनले दुवै सदनमा बहुमत गुमाएको स्वीकार गर्दै सिबिएस न्युजसँगको अन्तर्वार्तामा हारको समीक्षा गरेका हुन्।
ट्रम्पले पहिलो कारणका रूपमा इरानविरुद्धको सैन्य कारबाहीप्रतिको जनअसन्तुष्टिलाई औंल्याए। सिबिएसको निर्वाचनपछिको सर्वेक्षणमा झन्डै ६० प्रतिशत मतदाताले इरानमाथिको सैन्य कारबाही गलत भएको बताएका थिए भने रिपब्लिकन मतदातामध्ये झन्डै एक चौथाइले पनि त्यही धारणा राखेका थिए। उपराष्ट्रपति जेडी भान्सले समेत युद्धलाई नै हारको मुख्य कारण भनेका थिए। ट्रम्पले इरानलाई आणविक हतियार बनाउनबाट रोक्न युद्ध आवश्यक भएको दाबी दोहोर्याए पनि मतदाताले युद्ध नरुचाएको स्वीकार गरे।
दोस्रो कारण महँगी हो। उनले आयोवामा प्रतिग्यालन १.८५ डलर रहेको पेट्रोलको मूल्य ३.५० देखि ४ डलरसम्म पुगेको उदाहरण दिँदै मूल्यवृद्धिले मतदातालाई असन्तुष्ट बनाएको बताए। सर्वेक्षणमा करिब तीन चौथाइ मतदाताले अर्थतन्त्रको अवस्था राम्रो नभएको बताएका थिए भने झन्डै ९० प्रतिशतले जीवनयापनको खर्चलाई मतदानको महत्त्वपूर्ण विषय मानेका थिए। तर रोजगारी र सेयर बजार राम्रा रहेको भन्दै ट्रम्पले सरकारको काम मतदातासम्म पुर्याउन नसकिएको बताए।
तेस्रो कारणका रूपमा उनले इसराइलप्रतिको नकारात्मक धारणा बढ्दै गएको उल्लेख गरे। इरान युद्धमा अमेरिकाको संलग्नतापछि इसराइललाई दिइएको समर्थनबारे बहस चर्किएको र यसले पनि पार्टीलाई असर गरेको उनको भनाइ थियो।
चौथो कारण आप्रवासन नीतिको कठोर कार्यान्वयन हो। सीमा बन्द गरेकोमा आफूले राम्रो अंक पाउनुपर्ने बताए पनि वर्षौंदेखि अमेरिकामा बसेर काम गरिरहेका र अपराधमा संलग्न नभएका मानिसलाई समेत देशनिकाला गर्नु बढी कठोर भएको उनले स्वीकार गरे। लामो समयदेखि बसेका त्यस्ता आप्रवासीलाई बस्न दिने व्यवस्थाका लागि डेमोक्र्याटसँग सहमति गर्न सकिने संकेत गर्दै उनले हत्यारा, बलात्कारी, हिंस्रक अपराधी र लागुऔषध कारोबारीलाई भने निकाल्नैपर्ने अडान दोहोर्याए।
