काठमाडौं । अमेरिकी राष्ट्रपति डोनाल्ड ट्रम्पले इजरायललाई हरेक वर्ष दिँदै आएको सैन्य सहयोग यसै वर्षभित्र पूर्ण रूपमा अन्त्य गर्ने घोषणा गरेका छन्। मध्यावधि निर्वाचनकै दिन आएको यो घोषणाले इजरायली राजनीतिमा ठूलो हलचल मच्चाएको छ।
ट्रम्पले फक्स न्युजसँगको अन्तर्वार्तामा इजरायल आर्थिक रूपमा बलियो भइसकेको र उसलाई अब बाहिरी सहयोगको आवश्यकता नरहेको तर्क गरे। ‘इजरायल हाम्रो सबैभन्दा नजिकको साझेदार हो। हामीले अरू कसैलाई भन्दा बढी रकम दियौँ। तर अब उनीहरूलाई त्यो चाहिँदैन,’ उनले भने। वार्षिक ३ अर्ब ८० करोड डलर बराबरको यो सहयोग सन् २०२८ सम्म निरन्तरता दिने औपचारिक समझदारी थियो, जुन निर्धारित मितिभन्दा दुई वर्षअघि नै टुंगिन लागेको हो।
इजरायली राष्ट्रपति आइज्याक हर्जोगले यो खबरले आफूलाई गहिरो चिन्तामा पारेको बताएका छन्। उनले निर्णयलाई ‘आकाशबाट चट्याङ परे जस्तै’ भएको टिप्पणी गरे। प्रधानमन्त्री बेन्जामिन नेतान्याहूका प्रमुख प्रतिद्वन्द्वी गादी आइजेनकोटको पार्टीका नेताहरूसँगको भेटमा हर्जोगले पटक–पटक निर्वाचन गराउनुभन्दा स्थिर सरकार गठन गर्नुपर्नेमा जोड दिए।
उता, इजरायलका लागि अमेरिकी राजदूत माइक हकाबीले यो निर्णयबारे वासिङ्टनसँग स्पष्टीकरण मागिरहेको बताएका छन्। उनले दुई देशको साझेदारीले अमेरिकी जनताको जीवनमा पनि ठूलो फाइदा पुर्याएको दाबी गरे। अमेरिकी उपराष्ट्रपति जेडी भान्सले भने इजरायललाई अत्यधिक सहयोग गरेकै कारण रिपब्लिकनहरूले मध्यावधि निर्वाचन हारेको भन्ने दाबी अस्वीकार गरे। उनले रुढीवादी र रिपब्लिकन खेमामा इजरायलप्रतिको समर्थन कमजोर नभएको जिकिर गरे।
