काठमाडौं — नेपाली कांग्रेसका उपसभापति मधु आचार्यले वर्तमान सरकार प्रतिशोध, क्रोध, भय र भ्रमको आधारमा चलिरहेको आरोप लगाएका छन्। सोमबार काठमाडौंमा रिपोटर्स क्लब नेपालले आयोजना गरेको साक्षात्कारमा बोल्दै उनले सरकार गठन भएको छ महिना पनि नपुग्दै पारदर्शितामाथि गम्भीर प्रश्न उठ्न थालेको बताए।
आचार्यका अनुसार सरकारको कार्यशैली, निर्णय गर्ने तरिका र सरोकारवालासँग संवाद नहुनुले देशमा विचौलिया हाबी हुने अवस्था बनेको छ। कार्यकारी र सरोकारवालाबीच नियमित छलफल नहुँदा विचौलियाहरूले सरकारको नाममा आफ्नो स्वार्थ पूरा गर्ने मौका पाइरहेको उनको भनाइ छ।
उनले दानबहादुर कार्कीलाई पदबाट हटाइएको विषयमा पनि सरकारले स्पष्ट जवाफ दिनुपर्ने माग गरे। प्रमुख प्रतिपक्षी दलका रूपमा कांग्रेस सरकारलाई आवश्यक सहयोग गर्न तयार रहेको उल्लेख गर्दै आचार्यले सरकारले नै सहकार्यको वातावरण बनाउन नखोजेको आरोप लगाए।
सरकारले संसद्लाई छलेर अध्यादेशमार्फत शासन चलाउन खोजेको टिप्पणी गर्दै उनले विधायिकाको भूमिकालाई कमजोर बनाउन नहुने बताए। अध्यादेशको बाटो रोज्दा संसद्को भूमिका खुम्चिने र लोकतान्त्रिक प्रक्रियामाथि नै असर पर्ने उनको भनाइ थियो।
