पाकिस्तानको रावलपिण्डीमा आइतबार टेलिभिजन प्रस्तोता राबिया अहसानको आफ्नै घरमा गोली लागेर मृत्यु भएको छ। घाँटीमुनिको भागमा गोली लागेकी ४१ वर्षीया राबिया गुलशनाबाद क्षेत्रमा बस्दै आएकी थिइन्।
राबियाका पतिले पेस्तोल मिलाउने क्रममा अचानक गोली चलेको दाबी गरेका छन्। पेस्तोलमा गोली भरिएको छ भन्ने आफूलाई थाहा नभएको उनको भनाइ छ। तर राबियाका दाजुभाइको उजुरीका आधारमा प्रहरीले उनका पतिलाई हिरासतमा लिएको छ र घटनामा प्रयोग भएको बन्दुक पनि बरामद गरेको छ।
गोली चल्दा राबियाका १३ र ११ वर्षका दुई छोरी घरको प्राङ्गणमा आफ्नी मावली हजुरआमासँग बसिरहेका थिए। प्रहरीले घरमा काम गर्ने एक कर्मचारीसँग पनि सोधपुछ गरेको छ। प्रहरीले सदर बेरुनी प्रहरी चौकीमा हत्याको मुद्दा दर्ता गरेको छ भने पञ्जाब फरेन्सिक साइन्स एजेन्सीको टोलीले घरबाट प्रमाण जुटाइरहेको छ। राबियाको शव पोस्टमार्टमका लागि अस्पताल पठाइएको थियो।
राबिया एक निजी टेलिभिजन च्यानलमा प्रस्तोता र कार्यक्रम सञ्चालिका थिइन्। यसअघि उनले वरिष्ठ पत्रकार आमिर मतिन र रउफ क्लासरासँग करेन्ट अफेयर्सको कार्यक्रम पनि सञ्चालन गरेकी थिइन्। उनको मृत्युप्रति पाकिस्तानका राष्ट्रपति आसिफ अली जरदारीकी छोरी आसिफा भुट्टो जरदारीले दुःख व्यक्त गर्दै हत्याको निन्दा गरेकी छन् र निष्पक्ष तथा पारदर्शी छानबिनको माग गरेकी छन्।
पाकिस्तानमा महिलाविरुद्ध हिंसाका घटना बढिरहेका छन्। मानवअधिकार मन्त्रालयका अनुसार सन् २०२१ देखि २०२४ बीचमा महिलाविरुद्ध हिंसाका १ लाख ७३ हजारभन्दा बढी उजुरी दर्ता भएका छन्। गत अगस्टमा पनि रावलपिण्डीमै ४५ वर्षीया डिजिटल मिडिया अधिकारी हिना जावेद आफ्नै घरमा मृत फेला परेकी थिइन्।
