तुलसीपुर । यमपञ्चकको तेस्रो दिन गाई तिहारको अवसरमा दाङको तुलसीपुरस्थित बेलझुण्डी गौशालामा रहेका छ सयभन्दा बढी गाईको सामूहिक पूजा गरिएको छ । योगी आदित्यनाथ फाउन्डेसनले सञ्चालन गरेको गौशालामा सोमबार स्थानीय बासिन्दाको सहभागितामा पूजा सम्पन्न भएको हो ।
फाउन्डेसनका अध्यक्ष भोलानाथ योगीका अनुसार गाई तिहारका दिन गौशालामै सामूहिक पूजा गर्ने परम्परा हरेक वर्ष निरन्तर चल्दै आएको छ । यस वर्ष पनि सोही परम्पराअनुसार पूजा गरिएको उनले बताए । सोही दिन लक्ष्मीको हवन पूजा समेत गरिएको थियो ।
पूजाका क्रममा विभिन्न दाताले गाईलाई खाना समेत प्रदान गरेका थिए । गौशाला विश्वविद्यालयको जग्गा भाडामा लिएर सञ्चालनमा ल्याइएको हो ।
तर, गौशाला सञ्चालन गर्नु सहज नभएको अध्यक्ष योगीले बताए । गाईगोरुलाई खुवाउनुपर्ने खानपानको व्यवस्थापन नै सबैभन्दा ठूलो चुनौती रहेको उनको भनाइ छ । विभिन्न दाताको सहयोगले नै गौशाला चलिरहेको उनले बताए ।
