पेरिस । फ्रान्सका चर्चित जुडो खेलाडी टेडी राइनरले सन् २०२७ मा हुने राष्ट्रपतीय निर्वाचनमा उम्मेदवारी दिने घोषणा गरेका छन्। ३७ वर्षीय राइनरले सामाजिक सञ्जालमार्फत आफ्नो उम्मेदवारी सार्वजनिक गरेका हुन्।
आफूलाई परिचय गराउँदै राइनरले भने, ‘मेरो नाम टेडी राइनर हो र आज म तपाईंहरूसमक्ष प्रत्यक्ष रूपमा घोषणा गर्दछु— म सन् २०२७ को राष्ट्रपतीय निर्वाचनमा उम्मेदवार हुँ।’
राइनरको यो कदम त्यस्तो बेला आएको हो, जतिबेला वर्तमान राष्ट्रपति इम्यानुएल म्याक्रोनको उत्तराधिकारी छनोट गर्ने निर्वाचनको तयारी भइरहेको छ। अति दक्षिणपन्थी नेतृ मरिन ले पेन जनमत सर्वेक्षणमा अगाडि देखिएकी छन्। राइनरले फ्रान्समा अति दक्षिणपन्थी शक्तिहरूको उदयप्रति आफू गम्भीर रूपमा चिन्तित रहेको यसअघि नै बताउँदै आएका छन्।
खेल जीवनमा राइनरले जुडोमा पाँच ओलम्पिक स्वर्ण पदक जितेका छन्। उनले सन् २०१२, २०१६ र २०२४ को ओलम्पिकमा हेभीवेट विधा तथा सन् २०२० र २०२४ को ओलम्पिकमा मिश्रित टोली विधामा स्वर्ण जितेका हुन्। उनले ११ पटक विश्व च्याम्पियनसिपको उपाधि पनि हासिल गरेका छन्।
फ्रान्समा खेलाडी राजनीतिमा आउनु नयाँ भने होइन। अर्का चर्चित जुडो खेलाडी डेभिड डुइलेट सन् २००९ मा फ्रान्सेली संसद्मा निर्वाचित भएका थिए र सन् २०११ को सेप्टेम्बरदेखि २०१२ को मेसम्म खेलकुदमन्त्रीको जिम्मेवारी सम्हालेका थिए।
