काठमाडौँ — ओमानमा जारी यु–१९ एसिया कप क्रिकेटमा नेपाल पाकिस्तानसँग १०१ रनले पराजित भएको छ। ओमानको अल अमिरात क्रिकेट मैदानमा मंगलबार भएको समूह चरणको अन्तिम खेलमा नेपालले हारसँगै प्रतियोगिताबाट बाहिरिनुपरेको छ।
पाकिस्तानले दिएको २७६ रनको लक्ष्य पछ्याएको नेपाल ४३ दशमलव ४ ओभरमा सबै विकेट गुमाउँदै १७४ रनमा समेटियो। नेपालका लागि रोहित चन्दले सर्वाधिक ३७ रन बनाए। उनले ५४ बलमा ३ चौका प्रहार गरे। निरजकुमार यादवले ५९ बलमा २९ रन बनाउँदा अभय यादवले १६ बलमा २३ रन जोडे। सूर्यांशु कोइरालाले २२ र दर्श सोनारले २० रन बनाए। सोहेल कुँवरले १४, रोशन शाहीले ७ तथा आशिष लुहारले ६ रन जोडे। कप्तान विपिन शर्मा एक रनमा अविजित रहे।
बलिङतर्फ पाकिस्तानका अहमद हुसेनले १० ओभरमा ३५ रन खर्चेर ४ विकेट लिए। मोहम्मद हुजैफा र मोहम्मद सय्यमले दुई–दुई विकेट लिए भने जहांगिर बिलाल र रिजवानुल्लाहले समान एक–एक विकेट लिए।
यसअघि टस हारेर पहिला ब्याटिङको निम्तो पाएको पाकिस्तानले निर्धारित ५० ओभरमा ७ विकेट गुमाउँदै २७५ रनको योगफल बनाएको थियो। पाकिस्तानका लागि अहमद हुसेनले ७३ बलमा सर्वाधिक ८९ रन बनाए। उनले ७ चौका र २ छक्का प्रहार गरे। कप्तान फरहान युसुफले ९५ बलमा ७४ रनको योगदान दिए। हसनैन अब्बास दारले २५, जहाँगीर बिलालले २२ तथा उस्मान खानले १९ रन बनाए। नेपालका लागि विपिन शर्माले १० ओभरमा ५८ रन खर्चेर ३ विकेट लिए भने सुशिल रावलले दुई तथा सचिन भट्ट र अभय यादवले समान एक–एक विकेट लिए।
नेपाल यसअघि भारतसँग १० विकेटले तथा यूएईसँग ७ विकेटले पराजित भएको थियो।
