बेलायती राजकुमार ह्यारीले सामाजिक सञ्जालका कारण ज्यान गुमाएका बालबालिकाको विषयमा चिन्ता व्यक्त गर्दै प्रविधि कम्पनीहरूलाई बालसुरक्षामा बढी जिम्मेवार र पारदर्शी बन्न आह्वान गरेका छन्। उनले सन्तान गुमाएका अभिभावकलाई मृत्युको कारण पत्ता लगाउन आवश्यक डिजिटल विवरण उपलब्ध गराउन पनि आग्रह गरे।
युरोपेली संसद्मा मङ्गलबार सामाजिक सञ्जालका कारण ज्यान गुमाएका बालबालिकाको सम्झनामा निर्माण गरिएको ‘लस्ट स्क्रिन मेमोरियल’ उद्घाटन गर्दै ह्यारीले यस्तो आह्वान गरेका हुन्। स्मारकमा दिवङ्गत बालबालिकाका तस्बिरसहित ठूला स्मार्टफोनका प्रतिकृति राखिएका छन्।
पत्नी मेघन मार्कलसहित कार्यक्रममा उपस्थित ह्यारीले प्रविधि कम्पनीहरूले बालबालिकालाई अनुपयुक्त सामग्रीबाट जोगाउनुपर्ने बताए। साथै, सन्तान गुमाएका अभिभावकलाई उनीहरूका विद्युतीय उपकरणमा रहेका विवरण प्राप्त गर्न सहयोग गर्नुपर्ने उनको भनाइ थियो। कतिपय अभिभावकले सन्तानको मृत्युको कारण पत्ता लगाउन उनीहरूको फोनमा पहुँच पाउन आठ वर्षसम्म कुर्नुपरेको उनले उल्लेख गरे।
मेघनका पिता थोमस मार्कल सिनियरमाथि बाल यौन दुर्व्यवहारसम्बन्धी सामग्री राखेको आरोप लागेपछि ह्यारी र मेघन पहिलोपटक सार्वजनिक कार्यक्रममा देखिएका हुन्। सुरुमा सम्बोधन गर्ने कार्यक्रम रहे पनि भावनात्मक रूपमा तयार नभएको भन्दै मेघन पछि हटेकी थिइन्।
थोमस मार्कल सिनियरलाई निगरानीका लागि खुट्टामा लगाइएको विद्युतीय उपकरण हटाएपछि मङ्गलबार जेल पठाउन अदालतले आदेश दिएको थियो।
