देशभर झिलिमिली बत्ती र देउसीभैलोको रौनक छाएको बेला भोटेकोशी बाढीबाट विस्थापित भएका परिवारका लागि यो तिहार अँध्यारो बनेको छ। भदौ १० गते आएको बाढीमा घर, थातथलो र आफन्त गुमाएका नुवाकोट र रसुवाका बासिन्दा डेढ महिनादेखि त्रिपालमुनि कष्टकर जीवन बिताइरहेका छन्।
विदुर नगरपालिका–५ का बाँडाचौतारा, पिपलटार, माझीटार ठूलोगाउँ र पोष्टबहादुर बोगटी पार्क गरी चार स्थानमा करिब दुई हजार विस्थापित बसोबास गरिरहेका छन्। लामिबगैंचा, बाँडाचौतारा र पिपलटारसँगै रसुवाको बेत्रावती र स्याफ्रुबेंसीका शिविर पनि सुनसान छन्। शिविरमा बालबालिका पिङमा रमाए पनि अभिभावकका लागि चाडपर्वको कुनै उमंग छैन।
रसुवाबाट विस्थापित भएका ३४४ परिवारका ३१५ जना सदस्य बाढीमा गुमेका छन्। उत्तरगया गाउँपालिका–१ का मात्रै ४९५ जना मृत्यु वा बेपत्ता भएका छन्। धेरै परिवारले आफन्तको शोकमा यस वर्ष दशैँ र तिहार दुवै मनाएनन्। उत्तरगया–१ का पूर्ववडाध्यक्ष बमबहादुर तामाङ भन्छन्, सबथोक गुमाइसकेपछि चाडपर्वको खुसी सधैँका लागि खोसिएजस्तो लाग्छ।
लामिबगैंचाको अस्थायी शिविरमा देविघाटबाट विस्थापित ३० दलित परिवारका करिब एक सय जना ७५ दिनभन्दा लामो समयदेखि बसिरहेका छन्। देविघाट क्षेत्र अहिले बगरमा परिणत भएको छ र करिब ४०० घरपरिवारको घरवास बाढीले लगेको छ। ७० वर्षीया गोपी नेपाली साँघुरो त्रिपाललाई नै घर मानेर दिन बिताइरहेको बताउँछिन्।
विस्थापित तेन्जिङ भुटी भने अझै आशावादी छिन्। सुरक्षित बसोबासको व्यवस्था भयो भने आगामी वर्ष फेरि चाडपर्व मनाउन पाइने उनको आशा छ।
