बाजुरा । सङ्घीयता आएको एक दशक हुनै लाग्दा पनि बाजुराका चारवटा वडामा सडकको पहुँच पुग्न सकेको छैन। सडक पूर्वाधारलाई विकासको प्रमुख आधार मानिने गरे पनि ती बस्तीका बासिन्दा आधारभूत सुविधाबाट वञ्चित छन्। बिरामीलाई स्वास्थ्य संस्थासम्म पुर्याउन, खाद्यान्न ढुवानी गर्न र कृषि उपज बजारसम्म लैजान उनीहरूले घण्टौँ पैदल हिँड्नुपर्ने बाध्यता छ।
क्षेत्रफलको हिसाबले जिल्लाकै सबैभन्दा ठूलो हिमाली गाउँपालिकाको ८३० वर्ग किलोमिटर भूभाग जिल्लाको कुल दुई हजार १८८ वर्ग किलोमिटरमध्ये पर्छ। भौगोलिक विकटताले यहाँ विकास निर्माण अन्य पालिकाको तुलनामा कठिन छ। यस पालिकाका वडा नम्बर २ र ३ मा अझै सडक पुगेको छैन। गाउँपालिका केन्द्र धुलाचौर पुग्न स्थानीय बासिन्दालाई दुईदेखि तीन दिन पैदल हिँड्नुपर्छ। खाद्यान्न मानिस वा खच्चडमार्फत ढुवानी गर्नुपर्ने बाध्यता रहेको स्थानीय धनबहादुर रोकायाले बताए।
हिमाली गाउँपालिकाका अध्यक्ष गोविन्दबहादुर मल्लले सङ्घ र प्रदेशबाट ठूलो बजेट नआउँदा सडक जोड्न नसकिएको बताए। उनका अनुसार वडा नम्बर १ मा भर्खरै सडक पुगेको छ भने वडा २ का लागि एक करोड ५० लाख र वडा ३ का लागि एक करोड ९० लाख रुपैयाँ बजेट छुट्याएर यसै वर्ष सडक पुर्याउने लक्ष्य राखिएको छ। छिट्टै ठेक्का प्रक्रिया अघि बढाइने उनको भनाइ छ।
यता, गौमुल गाउँपालिका–१ अम्लिसमा दुई वर्षअघि एक करोड ५० लाख रुपैयाँमा ठेक्का सम्झौता भए पनि निर्माण कम्पनीले काम सुरु नगरेको गाउँपालिका अध्यक्ष हरिबहादुर रोकायाले बताए। आगामी मङ्सिर मसान्तसम्म अन्तिम समय दिइएको र त्यस अवधिमा काम सुरु नभए ठेक्का रद्द गर्ने प्रक्रिया अघि बढाइने उनको भनाइ छ।
त्रिवेणी नगरपालिका–५ किम्नीमा पनि सडक पुगेको छैन। भोट माग्दा नेताहरूले सडक पुर्याउने आश्वासन दिए पनि काम नभएको स्थानीय तुली बुढाको गुनासो छ। नगरपालिका प्रवक्ता मीनबहादुर भण्डारीका अनुसार दुई–तीन ठाउँबाट ट्र्याक खोलिए पनि पर्याप्त बजेट अभावले निर्माण अघि बढ्न सकेको छैन।
समग्रमा, जिल्लाका सबै बस्तीलाई सडक सञ्जालमा जोड्न स्थानीय, प्रदेश र सङ्घीय सरकारबीच समन्वय आवश्यक देखिएको छ। आर्थिक वर्ष २०८२/८३ मा मार्तडी–कोल्टी सडकका लागि छुट्याइएको २० करोड र खप्तड–गैरीखाद–आटीचौर सडकका लागि छुट्याइएको १३ करोड ५० लाख रुपैयाँ बजेट खर्च हुन नसकी फिर्ता भएको थियो।
