पाकिस्तान राष्ट्रिय ट्वान्टी–२० टोलीका कप्तान साहबजादा फर्हान नेपाल आइपुगेका छन्। कर्णाली याक्समा अनुबन्ध भएका उनी तेस्रो संस्करणको नेपाल प्रिमियर लिग (एनपीएल) खेल्न शनिबार त्रिभुवन अन्तर्राष्ट्रिय विमानस्थलमा अवतरण गरेका हुन्। विमानस्थलमा कर्णाली याक्स स्पोर्ट्स प्रालिका प्रतिनिधिले उनको स्वागत गरेका थिए।
तीस वर्षीय दायाँ हाते शीर्षक्रमका ब्याटर फर्हानलाई कर्णालीले शुक्रबार अनुबन्ध गरेको घोषणा गरेको थियो। उनी कर्णालीमा अनुबन्ध हुने दोस्रो पाकिस्तानी राष्ट्रिय खेलाडी हुन्। यसअघि बिहीबार अनुबन्ध भएका चर्चित अलराउन्डर हुसैन तलात पनि नेपाल आइसकेका छन्।
फर्हानले सन् २०१८ मा अस्ट्रेलियाविरुद्ध खेल्दै ट्वान्टी–२० अन्तर्राष्ट्रियमा डेब्यु गरेका थिए। पाकिस्तानका लागि ५१ ट्वान्टी–२० अन्तर्राष्ट्रिय खेल्दा उनले एक हजार ५५४ रन बनाएका छन्, जसमा दुई शतक र १३ अर्धशतक छन्। रावलपिन्डीमा भएका पछिल्ला तीन ट्वान्टी–२० अन्तर्राष्ट्रियमा उनले लगातार अर्धशतक प्रहार गरेका थिए।
कर्णाली याक्सले अहिलेसम्म ६ विदेशी खेलाडी अनुबन्ध गरिसकेको छ। फर्हान र तलातसँगै बंगलादेशका अरिफुल इस्लाम र अकबर अली, दक्षिण अफ्रिकाका डेविड मिलर तथा दोस्रो सिजनमा उत्कृष्ट प्रदर्शन गरेका स्कटल्यान्डका अलराउन्डर मार्क वाट टोलीमा छन्। कात्तिक ९ बाट सुरु हुने एनपीएलका लागि कर्णालीले घरेलु खेलाडीमा मार्की खेलाडी सोमपाल कामीसहित गुल्शन झा, नन्दन यादव र विपिन शर्मालाई पनि अनुबन्ध गरेको छ।
