रुकुम पश्चिम । रुकुम पश्चिमको बाफिकोट गाउँपालिका–२ स्वारामा ढुङ्गा प्रहारबाट ६ वर्षीय बालकको मृत्यु भएको छ। शुक्रबार साँझ करिब साढे पाँच बजे घरनजिकै बाटोमा खेलिरहेका बलबहादुर नाथका छोरा रमेश नाथमाथि सोही ठाउँ बस्ने ३३ वर्षीय भक्तबहादुर नाथले एक्कासि ढुङ्गाले टाउकोमा प्रहार गरेका थिए। मानसिक अवस्था ठीक नभएका भक्तबहादुरको प्रहारबाट बालकको अवस्था गम्भीर भएको थियो।
घाइते बालकलाई तत्कालै उपचारका लागि स्वास्थ्य चौकी पिपल लगिएको थियो। त्यहाँ सम्भव भएसम्मको उपचारपछि अवस्था गम्भीर नै रहेकाले थप उपचारका लागि जिल्ला अस्पताल सल्ले पुर्याइएको थियो। सल्लेमा उपचारकै क्रममा सोही राति १० बजे चिकित्सकले बालकलाई मृत घोषणा गरेका थिए।
ढुङ्गा प्रहार गर्ने भक्तबहादुर नाथलाई प्रहरीले नियन्त्रणमा लिएको छ। घटनास्थलबाट आवश्यक प्रमाण सङ्कलन गरी प्रहरीले थप अनुसन्धान अघि बढाएको जनाइएको छ।
