काठमाडौं महानगरपालिकाले कात्तिक १३ देखि १५ गतेसम्म काठमाडौं फिल्म फेस्टिभल आयोजना गर्ने भएको छ। अक्टोबर ३० देखि नोभेम्बर १ सम्म चल्ने महोत्सवमा नेपाली तथा अन्तर्राष्ट्रिय गरी ४० वटा चलचित्र नि:शुल्क प्रदर्शन गरिनेछ। इच्छुक दर्शकले महानगरको आधिकारिक सामाजिक सञ्जालमार्फत नि:शुल्क अनलाइन टिकट बुक गर्न सक्नेछन्।
महोत्सवको पहिलो दिन वसन्तपुर डबलीमा खुला आकाशमुनि विशेष स्क्रिनिङबाट उद्घाटन गरिनेछ। दोस्रो र तेस्रो दिन ऐतिहासिक राष्ट्रिय सभागृह र जय नेपाल सिनेमा हलमा चलचित्र देखाइनेछन्। सभागृहमा विशेषगरी ७० र ८० को दशकका पुराना मौलिक नेपाली चलचित्र प्रदर्शन गरिने बताइएको छ।
यसै महोत्सवको प्रवर्द्धनका लागि महानगरले शनिबार वसन्तपुरबाट सुरु हुने १० किलोमिटर लामो हेरिटेज रन आयोजना गरेको थियो। विभिन्न उमेर समूहका धावक सहभागी भएको उक्त दौडमा ७५ वर्षका ज्येष्ठ नागरिकदेखि बालबालिकासम्मले दूरी पार गरेका थिए। अनलाइन दर्ता खुलेको २४ घण्टाभित्रै कोटा भरिएपछि दर्ता बन्द गर्नुपरेको थियो।
कार्यक्रममा बोल्दै महानगरकी कार्यवाहक प्रमुख सुनिता डंगोलले काठमाडौंका मन्दिर, गल्ली, परम्परा, संगीत र खानपानले सहरको मौलिक पहिचान झल्काउने बताइन्। दौडलाई केवल प्रतियोगिताका रूपमा नभई संस्कृति, सम्पदा र जनजीवनसँग जोडिने अवसरका रूपमा लिनुपर्ने उनको भनाइ थियो।
