दाङको दंगीशरण गाउँपालिका–६ मा रहेको जनता माध्यमिक विद्यालय बुटनियाको पछिल्लो यात्रा धेरै सामुदायिक विद्यालयका लागि एउटा उदाहरण बनेको छ। केही वर्षअघिसम्म भौतिक संरचना कमजोर रहेको र विद्यार्थी संख्या निकै थोरै रहेको यो विद्यालयले अहिले शैक्षिक नतिजामा उल्लेखनीय सुधार ल्याएको छ।
विक्रम संवत् २०५२ मा स्थापना भएको यस विद्यालयमा २०७६ सालदेखि कक्षा ६ बाट पढाइ सुरु गरिएको थियो। त्यसयता विद्यालयले हरेक परीक्षामा राम्रो नतिजा ल्याउँदै आएको छ। अहिलेसम्म यहाँबाट माध्यमिक शिक्षा परीक्षाका चार समूहका विद्यार्थीले परीक्षा दिइसकेका छन्। समग्र नतिजाका आधारमा पश्चिम दाङका सामुदायिक विद्यालयमध्ये यो विद्यालय अगाडि रहेको विद्यालयका प्रधानाध्यापक क्रिमलाल थारूले बताएका छन्।
गत वर्षको माध्यमिक शिक्षा परीक्षामा यस विद्यालयका ६ जना विद्यार्थीले ए प्लस प्राप्त गरेका थिए भने ८१ प्रतिशत विद्यार्थी उत्तीर्ण भएका थिए। प्रधानाध्यापक थारूका अनुसार विद्यालयप्रति शिक्षक र कर्मचारी पूर्ण रूपमा जिम्मेवार हुँदा यस्तो नतिजा सम्भव भएको हो। २०७६ सालदेखि नै यहाँ कार्यरत सबै शिक्षक र कर्मचारीका छोराछोरीलाई यही विद्यालयमा पढाउने निर्णय लागू गरिएको छ।
प्रधानाध्यापक थारूले आफ्नी छोरीले दुई वर्षअघि यही विद्यालयबाट माध्यमिक शिक्षा परीक्षा दिएको बताएका छन्। अन्य कर्मचारीका बालबालिका पनि यहीँ अध्ययनरत छन्। गुणस्तरीय र आधुनिक शिक्षा दिन विद्यालयमा तीन वटा स्मार्ट बोर्ड प्रयोग भइरहेको छ। साथै विज्ञान प्रयोगशाला, पुस्तकालय र विद्यालयकै चमेना गृहको व्यवस्था छ, जहाँबाट खाजा कार्यक्रम सञ्चालन भइरहेको छ।
तर विद्यार्थी संख्या बढ्दै जाँदा भौतिक सुविधामा भने चुनौती देखिएको छ। छात्राका लागि दुई वटा र छात्रका लागि एउटा मात्र शौचालय छ, जसले गर्दा लाइन लाग्नुपर्ने अवस्था छ। शिक्षक तथा कर्मचारीका लागि छुट्टै शौचालय छैन। हाल विद्यालयमा १५ जना शिक्षक र दुई जना कर्मचारी कार्यरत छन् भने ४५० भन्दा बढी विद्यार्थी अध्ययनरत छन्। तत्कालीन गाउँपालिकाका शिक्षा समितिका संयोजक वीरबहादुर वलीका अनुसार एक करोड बजेट विनियोजन गरेर भवन निर्माण गरिएको थियो र जहाँ विद्यार्थी, त्यहाँ शिक्षक अभियानमार्फत शिक्षक थपिएपछि सुधार आएको हो।
