उदयपुरको कटारी नगरपालिकामा सोमबार बिहान भएको सवारी दुर्घटनामा १५ जना घाइते भएका छन्। कटारी नगरपालिका–४ को मरुवा क्षेत्रमा सिद्धिचरण राजमार्ग हुँदै गइरहेको जिप ब्रेक फेल भएपछि सडकबाट तल खसेको थियो।
प्रहरीका अनुसार प्र.३–०१–०२३ च ६५०६ नम्बरको जिप नियन्त्रण गुमाएर सडकबाट करिब १० मिटर तल खसेको हो। दुर्घटनापछि स्थानीय र प्रहरीको टोलीले घाइतेहरूको उद्धार गरी उपचारका लागि कटारी अस्पताल पुर्याएको थियो।
घाइतेमध्ये कटारी नगरपालिका–२ का ७१ वर्षीय रामबहादुर मगरको अवस्था गम्भीर देखिएपछि थप उपचारका लागि उनलाई विराटनगर पठाइएको प्रहरीले जनाएको छ। त्यस्तै कटारी नगरपालिका–११ का २९ वर्षीय निर्पबहादुर खड्का सामान्य घाइते भएका छन्। अन्य घाइतेहरूको कटारी अस्पतालमै उपचार भइरहेको छ।
दुर्घटना कसरी भयो भन्नेबारे प्रहरीले थप अनुसन्धान गरिरहेको छ। ब्रेक फेल भएकै कारण जिप सडकबाट खसेको प्रारम्भिक अनुमान गरिएको छ।
