बंगालको खाडीमा बनेको चक्रवात अर्नब जमिनमा प्रवेश गरेपछि कमजोर हुँदै जाने अनुमान गरिएको छ। जल तथा मौसम विज्ञान विभागले मंगलबार दिउँसो जारी गरेको सन्देशमा यस्तो जानकारी दिइएको हो।
मौसमविद् विभूति पोखरेलका अनुसार अहिले समुद्रमा निकै शक्तिशाली अवस्थामा रहेको यो प्रणाली विशाखापट्टनम आसपास जमिनमा प्रवेश गर्नेछ। ढिला भएमा बिहीबार बिहानसम्ममा पनि जमिनमा पुग्न सक्छ। जमिनमा पुगेपछि यो उत्तरपश्चिमतर्फ अघि बढ्दै क्रमशः कमजोर हुनेछ र नेपाल नजिक पुग्दा न्यून चापीय क्षेत्र वा चक्रवाती प्रणालीका रूपमा मात्र रहन सक्ने अनुमान छ।
तर यसको सम्भावित मार्ग नेपालतर्फ देखिएकाले असरलाई बेवास्ता गर्न नमिल्ने विभागको भनाइ छ। बिहीबार, शुक्रबार र शनिबारका लागि चेतावनी जारी गरिएको छ। यस अवधिमा देशका धेरै ठाउँमा हल्कादेखि मध्यम वर्षा र केही ठाउँमा भारी वर्षा हुन सक्छ। उच्च हिमाली क्षेत्रमा भारी हिमपात, हिमपहिरो र हिमआँधीको जोखिम रहेकाले पदयात्रामा जानेहरूलाई विशेष सतर्कता अपनाउन भनिएको छ।
धान काट्ने समय भएकाले बिहीबारअघि नै धान भित्र्याउन किसानलाई आग्रह गरिएको छ। मंगलबार र बुधबार भने मौसम सामान्यतया सफा रहने अनुमान छ।
