कामदार पाउन कठिन हुन थालेपछि र ज्याला महँगिँदै गएपछि कपिलवस्तुका किसान धान छार्ने आधुनिक थ्रेसर मेसिनतर्फ आकर्षित हुन थालेका छन्। धान काटेर भित्र्याउने बेला खेताला नपाइने र परम्परागत तरिकाले दाइँ गर्दा समय र खर्च दुवै धेरै लाग्ने भएकाले मेसिनको प्रयोग बढेको किसानहरू बताउँछन्।
जिल्लाका धेरै ठाउँमा पाकेको धान भित्र्याउने चटारो चलिरहेको छ। यही क्रममा किसानले धान र पराल छुट्याउन थ्रेसर प्रयोग गरिरहेका छन्। कपिलवस्तु नगरपालिका–६ थुम्हवाका कृषक प्रभु धोवीका अनुसार गाउँमा कामदार पाउनै मुस्किल छ, पाइहाले पनि ज्याला महँगो पर्छ। थ्रेसरले काम छिटो हुने र खर्च घट्ने भएकाले धान भित्र्याउन मेसिनकै भर पर्न थालेको उनको भनाइ छ।
महाराजगञ्ज नगरपालिका–२ पडरियाका कृषक विनोद भुजले पनि गोरु र कृषि मजदुरको अभावमा सानो आकारका थ्रेसर खेतसम्म लैजान र चलाउन सजिलो हुने बताए। बिहान, दिउँसो र साँझसमेत मेसिन चलाउन मिल्ने भएकाले किसानलाई सहज भएको उनको भनाइ छ।
थ्रेसर सञ्चालक राकेश कुर्मीका अनुसार मेसिन प्रयोग गर्दा समय र श्रम बचत हुनुका साथै खर्च पनि कम पर्छ। उनले धान र पराल छुट्याएबापत प्रतिघण्टा दुई हजार ५०० देखि तीन हजार रुपैयाँसम्म लिने गरेका छन्। जिल्लामा थ्रेसरको माग बढ्दै गएको उनले बताए। यता कृषक श्यामलाल धोबीले आधुनिक प्रविधिले काम सहज बनाए पनि परम्परागत दाइँ संस्कृतिको संरक्षणमा ध्यान दिनुपर्ने बताए। कृषि ज्ञान केन्द्र कपिलवस्तुका प्रमुख घनश्याम चौधरीका अनुसार जिल्लामा ८४ हजार ५९१ हेक्टर खेती गरिँदै आएको छ। यस वर्ष ६३ हजार ६४८ हेक्टरमा धान खेती गरिएको छ भने गत वर्ष ६६ हजार २६५ हेक्टरमा धान लगाइएको थियो। जिल्लाका १० वटै स्थानीय तहका किसानले अहिले धान र पराल छुट्याउन थ्रेसर प्रयोग गरिरहेका छन्।
