इरानविरुद्ध सम्भावित सैन्य कदम चाल्ने विषयमा इजरायलका प्रधानमन्त्री बेन्जामिन नेतान्याहु र सेनाप्रमुख जनरल इयाल जमीरबीच मतभेद देखिएको छ। स्थानीय सञ्चारमाध्यमका अनुसार कुनै पनि कारबाही अघि बढाउनुअघि थप छलफल आवश्यक रहेको र त्यसको कानुनी आधार प्रस्ट हुनुपर्ने जमीरको अडान छ। विवादको केन्द्रमा रहेको निर्देशनबारे विस्तृत जानकारी भने सार्वजनिक भएको छैन।
यो खबर मङ्गलबार हुने निर्वाचनको ठीक अघि बाहिरिएको हो। नेतान्याहुले यस विषयमा उठेका आरोपलाई आधारहीन भन्दै खण्डन गरेका छन्। यसअघि उनले इरानको शासन ढाल्न सेना र गुप्तचर निकाय मोसादलाई निर्देशन दिएको दाबी गरेका थिए।
यसैबीच अमेरिकी राष्ट्रपति डोनाल्ड ट्रम्पले आइतबार नेतान्याहुको पक्षमा उभिँदै इजरायली मतदातालाई उनैलाई मतदान गर्न आग्रह गरे। ट्रम्पले इरानको सैन्य शक्ति र अर्थतन्त्र कमजोर भइसकेको दाबी गर्दै सुरु भएको काम पूरा गर्न नेतान्याहु फेरि प्रधानमन्त्री बन्नुपर्ने बताए।
निर्वाचनको दुई दिनअघि नेतान्याहुले तेल अभिभमा आणविक विस्फोट भएको देखाउने कृत्रिम बौद्धिकताबाट बनेको तस्बिर सार्वजनिक गर्दै आफूलाई मत नदिए इजरायलीहरू ठूलो सङ्कटमा पर्न सक्ने चेतावनी दिएका थिए। इरानले आणविक हतियार हात पारे इजरायलकै अस्तित्व जोखिममा पर्ने उनको दाबी छ। पछिल्ला सर्वेक्षणले भने सत्तारूढ गठबन्धन र विपक्षीमध्ये कुनैले पनि सरकार बनाउन पुग्ने समर्थन जुटाउन नसक्ने देखाएका छन्, जसले निर्वाचनपछि पनि राजनीतिक गतिरोध लम्बिने सङ्केत गरेको छ।
