काठमाडौं । दसैँका समयमा वस्तु तथा सामग्रीको आपूर्ति सहज बनाउने उद्देश्यले चीनसँगको तातोपानी नाका तीन दिनका लागि अस्थायी रूपमा सञ्चालनमा आउने भएको छ। नाका अक्टोबर १८ देखि २० सम्म खुल्नेछ।उद्योग, वाणिज्य तथा आपूर्तिमन्त्री दीपक कुमार साहका अनुसार चिनियाँ पक्षले नेपाली पक्षको आग्रहलाई सम्बोधन गर्दै नाका अस्थायी रूपमा खोल्ने निर्णय गरेको हो। निर्णयअनुसार उक्त अवधिमा कार्गो ट्रकलाई मात्र आवतजावत गर्न अनुमति दिइनेछ।नेपाल र चीनबीचको प्रमुख व्यापारिक मार्गका रूपमा रहेको तातोपानी नाका विभिन्न कारणले बन्द हुँदा चाडपर्वको समयमा आपूर्ति व्यवस्थापनमा चुनौती देखिँदै आएको छ। यही पृष्ठभूमिमा सरकारले दसैँका बेला आवश्यक वस्तुको आपूर्ति सहज बनाउन नाका अस्थायी रूपमा सञ्चालनमा ल्याउने पहल गरेको हो।नाकाको अस्थायी सञ्चालनले नेपाल–चीन व्यापारिक आवागमनलाई सहजीकरण गर्नुका साथै चाडपर्वका बेला आपूर्ति व्यवस्थापनमा सहयोग पुग्ने अपेक्षा गरिएको छ।