बडादसैँको सातौँ दिन महासप्तमीको अवसरमा मधेश प्रदेशको राजधानी जनकपुरधामका प्रसिद्ध शक्तिपीठहरूमा धार्मिक विधिअनुसार धूमधामका साथ फूलपाती भित्राइएको छ।
ऐतिहासिक राजदेवी मन्दिरमा नेपाली सेना, सशस्त्र प्रहरी बल र नेपाल प्रहरीको संयुक्त टोलीले सलामी दिएसँगै फूलपातीको प्रवेश गराइएको हो। श्री महावीर युवा कमिटी र श्री राम युवा कमिटीको संयुक्त आयोजना भएको कार्यक्रममा बिहानैदेखि ठूलो सङ्ख्यामा भक्तजनको उपस्थिति थियो।
राजदेवी मन्दिर परिसरबाट सुरु भएको विशेष शोभायात्रा परम्परागत बाजागाजा र सांस्कृतिक झाँकीसहित जनकपुरधामको गिरिनारी कुट्टी प्राङ्गणसम्म पुगेको थियो। त्यहाँ रहेको पवित्र बेलको रूखमुनि वैदिक विधिबाट पूजाअर्चना गरिएपछि बेलको फल टिपेर ल्याइएको हो।
सुरक्षा निकायको गारत सलामी र भक्तजनको जयघोषबीच बेलको फलसहितको नवपत्रिका राजदेवी मन्दिरको गर्भगृहमा विधिपूर्वक भित्राइएको मन्दिर व्यवस्थापन र स्थानीय अगुवाहरूले बताएका छन्।
मिथिलाञ्चलमा बेलको पूजा र विधिलाई अत्यन्तै श्रद्धा र महत्त्वका साथ लिने गरिन्छ। परम्पराअनुसार षष्ठी तिथिको साँझ बेलको फललाई रातो वा पहेँलो कपडाले बाँधेर विधिवत् रूपमा निम्तो दिने प्रचलनलाई स्थानीय भाषामा ‘बेलनौती’ भनिन्छ। त्यसैगरी, सप्तमीको बिहान निम्ता गरिएको बेलको फल टिपेर मन्दिरमा ल्याई शक्तिस्वरूपा भगवतीलाई चढाउने विधिलाई ‘बेलतोडी’ भनिन्छ।
शताब्दीयौँ पुरानो यो मौलिक परम्पराले मिथिलाको सांस्कृतिक वैभव र प्रकृतिपूजक विशिष्ट चरित्रलाई उजागर गरेको छ। फूलपाती भित्रिएसँगै जनकपुरधामका शक्तिपीठहरूमा दर्शनार्थीहरूको घुइँचो बढेको छ।
