कपिलवस्तु । शिवराज नगरपालिका–१ बनकसबास्थित पूर्वपश्चिम राजमार्गमा शनिबार बिहान ट्रकसँग दुईवटा मोटरसाइकल ठोक्किँदा एक जनाको मृत्यु भएको छ भने एक जना घाइते भएका छन्। विपरीत दिशाबाट आएको ट्रकमा ती मोटरसाइकलहरू ठोक्किएको प्रहरीले जनाएको छ।जिल्ला ट्राफिक प्रहरी कार्यालयका प्रहरी निरीक्षक राजन ढकालका अनुसार दुर्घटनामा एउटा मोटरसाइकलका चालकको मृत्यु भएको हो। मृतकको अहिलेसम्म सनाखत हुन सकेको छैन।अर्को मोटरसाइकलका चालक दाङको गढवा गाउँपालिका–२ बचैयाका २३ वर्षीय दिलीपकुमार यादव घाइते भएका छन्। सो मोटरसाइकलमा सवार २१ वर्षीय अनिल योगी भने सकुशल रहेको प्रहरीले जनाएको छ।दुर्घटनापछि ट्रक चालक फरार भएका छन्। प्रहरीले तीनवटै सवारीसाधन नियन्त्रणमा लिएको छ र फरार चालकको खोजी भइरहेको जनाएको छ।