काठमाडौं । पूर्वप्रधानमन्त्री डा. बाबुराम भट्टराईले ठूला राष्ट्रिय चाडपर्व सकिनेबित्तिकै सरकार फेर्ने वा ढाल्ने विषयमा बहस सुरु हुनु विडम्बनापूर्ण भएको टिप्पणी गरेका छन्। मंगलबार फेसबुकमार्फत आफ्नो धारणा सार्वजनिक गर्दै उनले यस्तो प्रवृत्तिलाई चिन्ताजनक पनि भनेका छन्।
भट्टराईका अनुसार संविधानको सीमाभित्र रहेसम्म निर्वाचित सरकारलाई पूरा कार्यकाल काम गर्ने अवसर दिनुपर्छ। विगतमा पटकपटक सरकार परिवर्तन हुँदा त्यसले निम्त्याएका नकारात्मक परिणाम सबैले देखिसकेको उनको भनाइ छ। त्यही बाटो फेरि अपनाउनु भनेको मुलुकलाई अनिश्चिततातर्फ धकेल्नु भएको उनले बताएका छन्।
उनले यस्तो प्रवृत्तिले देशलाई अनिश्चितताको चक्रमा अल्झाइराख्ने, अर्थतन्त्रलाई झन् कमजोर बनाउने र युवालाई विदेशिन बाध्य पार्ने उल्लेख गरेका छन्। त्यसले अभिभावकलाई चिन्तामा पार्ने र मुलुकलाई जटिल भूराजनीतिक परिस्थितिको जोखिममा पुर्याउने उनको तर्क छ। उनले यसलाई दूरदृष्टिको अभाव र गम्भीर भूलका रूपमा चित्रित गरेका छन्।
उन्नत बहुदलीय लोकतन्त्रमा सत्तापक्ष र प्रतिपक्षबीच निरन्तर प्रतिस्पर्धा र सहकार्य हुनुपर्ने उनको भनाइ छ। संसद् र सडकमा आलोचना र प्रतिआलोचना हुनु स्वाभाविक र आवश्यक भएको उनले बताएका छन्।
साथै उनले सरकार र सत्ताका विभिन्न निकायमाथि निरन्तर निगरानी राख्न सबै नागरिकलाई आग्रह गरेका छन्। विपद्मा परेका, लामो समयदेखि वञ्चितीकरण भोगेका तथा गरिब र निमुखा नागरिकका आवाज सत्तामा रहेकाहरूले सुन्नुपर्ने उनको भनाइ छ।
जनताको आवाज नसुन्ने सत्ताधारीलाई कानुनसम्मत तरिकाले जवाफदेही बनाउनुपर्ने र आवश्यक परे हटाउनुपर्ने उनले बताएका छन्। तर संविधानको परिधिभित्र रहेसम्म निर्वाचित सरकारलाई काम गर्न दिनुपर्ने उनको जोड छ। काम नगरे वा बिगारे अर्को निर्वाचनमार्फत बिदा गर्नुपर्ने उनले लेखेका छन्।
