नेपाली कांग्रेसका महामन्त्री प्रदीप पौडेलले लोकतन्त्रको रक्षा, सुदृढीकरण र संस्थागत विकासमा तरुण युवाको भूमिका महत्त्वपूर्ण रहेको बताएका छन्। लोकतन्त्र संकटमा पर्दा तरुणहरूले निर्वाह गरेको भूमिका सराहनीय रहेको उनको भनाइ थियो।
नेपाल तरुण दलको ७४औँ स्थापना दिवसका अवसरमा नेपाल तरुण दल तनहुँले दमौलीमा आयोजना गरेको शुभकामना आदानप्रदान कार्यक्रममा उनले यस्तो बताएका हुन्। उनले तरुण दललाई नेपाली कांग्रेसको मेरुदण्डको संज्ञा दिए। पार्टीको संगठन सुदृढीकरण र रूपान्तरणमा युवाले सिर्जनात्मक भूमिका खेल्नुपर्नेमा उनले जोड दिए।
लोकतान्त्रिक आन्दोलन र लोकतन्त्रको रक्षामा तरुणहरूले पुर्याएको योगदान महत्त्वपूर्ण रहेको उनले बताए। आगामी दिनमा पनि लोकतान्त्रिक मूल्य, मान्यता र आदर्शको संरक्षणमा युवा सक्रिय हुनुपर्ने उनको धारणा थियो।
कांग्रेसले तरुण तथा युवालाई उच्च महत्त्व दिँदै आएको उनले बताए। पार्टीभित्र युवा पुस्ताको प्रतिनिधित्व बढ्दै गएको उनको भनाइ थियो। रूपान्तरणका लागि तरुणहरू संगठन विस्तारमा मात्र सीमित हुन नहुने उनले बताए। नयाँ सोच, विचार र सिर्जनात्मक कार्यक्रमबाट पार्टीलाई जनतासँग जोड्नुपर्ने उनको भनाइ थियो।
पार्टीमा भएका सुधार र परिवर्तनबारे जनतालाई बुझाउन सके कांग्रेसप्रतिको विश्वास थप बलियो हुने उनले बताए। कार्यक्रममा केन्द्रीय सदस्य चिनु पोख्रेलले पार्टीभित्र एकता आवश्यक रहेको बताइन्। केन्द्रीय सदस्य जगदीशचन्द्र पोख्रेल र दीपक भट्टराईले पनि तरुण दलको भूमिका र संगठन सुदृढीकरणबारे धारणा राखेका थिए।
