सुडानको पश्चिमी क्षेत्र डार्फरको न्याला सहरमा रहेको एउटा बजारमा सोमबार राति भएको ड्रोन आक्रमणमा कम्तीमा २१ जनाको ज्यान गएको छ। उक्त घटनामा ४० जनाभन्दा बढी घाइते भएका छन्। न्याला अस्पतालका एक चिकित्सकले मङ्गलबार मृत्यु र घाइतेको सङ्ख्या पुष्टि गरेका हुन्। यद्यपि, ज्यान गुमाउने र घाइते हुनेहरूमध्ये कति जना अर्धसैनिक बलका लडाकू थिए भन्ने अझै स्पष्ट भएको छैन।
स्थानीय बासिन्दाका अनुसार राति करिब ८ बजे सहरको उत्तरी भागमा पर्ने बजारमा ड्रोन खसेको थियो। चिकित्सा स्रोत र प्रत्यक्षदर्शीहरूले उक्त बजारलाई लक्षित गरेर आक्रमण भएको जानकारी दिएका छन्। अर्का बासिन्दाले सो बजारमा युवाहरू आउने गरेको र अर्धसैनिक द्रुत समर्थन बलका लडाकूहरू पनि त्यहाँ पुग्ने गरेको बताएका छन्। न्याला उक्त बलको प्रमुख आधार क्षेत्र मानिन्छ।
सुडानी सेनाले सन् २०२३ को अप्रिलदेखि नै द्रुत समर्थन बलसँग लडाइँ गरिरहेको छ। सेनाले न्यालामा पटकपटक आक्रमण गर्दै आएको छ। द्रुत समर्थन बलले न्यालालाई आफ्नो केन्द्र बनाएर खार्तुममा रहेको अन्तर्राष्ट्रिय मान्यताप्राप्त सरकारको विकल्पका रूपमा छुट्टै सरकार घोषणा गरेको छ।
पछिल्लो समय सुडानको युद्धमा ड्रोनको प्रयोग निकै बढेको छ। दुवै पक्षले विभिन्न क्षेत्रमा ड्रोनबाट आक्रमण गर्दा एकै पटक दर्जनौँ सर्वसाधारणको ज्यान जाने गरेको छ। संयुक्त राष्ट्रसङ्घको तथ्याङ्कअनुसार अक्टोबरका पहिलो तीन सातामा मात्र ड्रोन आक्रमणमा ३०० भन्दा बढी मानिस मारिएका छन् भने सयौँ घाइते भएका छन्। सहायता क्षेत्रमा काम गर्ने व्यक्तिहरूको अनुमानअनुसार सन् २०२३ मा युद्ध सुरु भएयता दुई लाखभन्दा बढी मानिसको मृत्यु भइसकेको छ। यो युद्धले सुडानमा विश्वकै सबैभन्दा ठूलो भोकमरी र विस्थापनको सङ्कट सिर्जना गरेको छ।
